Ì der RS ìm 1947i sìnd öiseri Telegraafepionier ùnd Fùnkerkùmpeniie scho zùm Tȁil motorisiert gsii. Mìt zwoor fȕr de Gìbììrgsdienscht ùnmögliche Faarzüüg. GMC Laschtwȁgen ùs amërikaanische Heeresbìschtȁnde hȁnd ȕberhaupt kȁin rȁchten Iischlag ghaa. Ì de Schöllene, aber hauptsȁchli dùr d Tremola am Gotthardpass hȁnd d Schofföören ùf de Hauptschtrooss bì jedem Rank müese ›saage‹ zùm Ùmechoo. Fȕr di schmaale Gìbììrgsschtrȍȍssli sìnd di brȁiten ùnd schwëëre Dodsch-Commander scho gaar nüüt gsii. Mìt dene hȁt mer mȁischtens nùr ȁimool probiert ùnd dȁnn halt de Zugs-Jeep mee bbrucht. Im Extreemfall hȁt mer aber öiseri Ross gliich no iigsetzt, öppen ìd Göscheneralp ufen ùnd s Ùnderalptaal ii. Es ìscht aber abzgsee gsii, das de ›Träng‹ bì dëre Waffegattig nȕme lang debii ìscht. Scho ì de Verlegigsziit vo Andermatt ùf Bülach use, sìnd d Säumer vìllmools mìt de lëëre Patrulliechȁren ùnderwȁgs gsii. Kaabelrolen ùnd Fȁldzȁntraale sìnd mìt em Jeep schnȁller an Oort choo. Au ì de WK ìm Pȕntnerland sìnd Ross ùnd Trängsoldaaten ìmmer weniger gfrooget gsii. Do hȁts dȁnn amel glii ghȁisse: «Chömed er efangs mìt öierne Heubüüch!»
Gliich hȁt dȁnn d Fùnkerkùmpenii 12 welen e Saumüebig ùf Fallein ufe mache. Mìt Fùnkgrääte hȁt vo öis niemert en Aanig ghaa, ùnd miinen UO-Koleege vom Fùnk hȁt die Üebig ȁinewȁȁg gschtùnke. Jede hȁt’s wele besser wȕsse, ùnd d Fùnker hȁnd kȁi Lùscht ghaa, ìri Gräät rȁcht ùf d Baschtsȁttel z brìnge, drùmm ìscht scho bìm Abmarsch ìd Hauptschtrooss aben uuschoo, das völlig faltsch gladen ìscht. De Welosattel vome Gȁneratoor hȁt eme Saumross ase tùmm an Hìnderchopf gschlage, das es verschrocken ùnd em nȕd uufmerksame Füerer dùrebbrȁnnt ìscht. Ùf de theerete Hauptschtrooss ìscht dë Gaul gschlìpft, hȁt ame Huusegge s Gnick bbrochen ùnd hȁt müese töödt wëërde. Au d Heerespolizei hȁt mer mìt dem Fall bìmüet, ùnd es hȁt e langwiirigi Ùndersuechig ggëë, won au nȕd vìll bbroocht hȁt. Ì der Erìnnerig ìscht mìr aber bblìbe, wie ùf ȁimool ȁine von eltere Fùnkerkorpis mìt eme Reglemȁnt fȕr de Saumdienscht usegrùckt ìscht. Jetzt hȁni scho no chùùrzer Ziit chöne «Kolonne zum Abmarsch bereit!» mȁlde, ùnd ooni wiiteri Ùmschtȁnd sìmmer dȁnn ì die Alp ufe choo. Z Fallein oben ìscht sofort de Fùnk uufgschtelt woorde. Ì chȕȕrzerschter Ziit hȁt mer au scho Verbìndig mìt em andere Zùùg ìm Bȁȁreboden ȁne ghaa. D Fùnker wo nȕd an Aperȁȁte bìschȁftiget gsii sìnd, hȁnd sich echli Lùft verschafft ùnd d Tschööpen abzogen ùnd ìri verschwìtzte Klamotten a der Sùne trȍchnet. Ùf ȁimool hȁt de ›Mùngg‹ es Zeetermordioo abgloo! [ 59 ] Ëër hȁt nȁmli sis verschwìtzti Militäärhȁmp an Lattehaag ane ghȁnkt wo derhìnder d Chüe gwȁidet hȁnd. Aaschiined echli e lȁcksȕchtigi Loobe hȁt Freud ghaa a dem salznasse Hȁmp. Wo’s de Fùnker Mondgenast gmërkt hȁt, hȁnd grad no zwee Hȁmpeermel zùr Chueschnoren uus «tschau» gwùnke. De ›Mungg‹ ìscht drufloos ùnd hȁt a siim Hȁmp aafoo zeere. Nooznoowen ìscht dȁnn en verchöjete Lùmpen usechoo. Ich hä fascht s Gfüül ghaa, de Chue chämmed drob Trääne. Ȁis Gaudi ìscht aber gsii, wo mer dë Bùndeslùmpe no em Wȁsche gschauet hȁnd. Verlȍcheret wien es Sììb ùnd nȕme zùm Flìcke. Die Episode hȁt’s öis echli liechter gmacht, ›s Harakiri‹ vome guete Ross lo verwërche.
D Wùche druuf sìnd dȁnn Manööver rùnd ùm de Piz Kesch. Do sìnd dȁnn öiseri Ross wìder z Eere choo. Zwȁi Joor schpȍȍter ìsches dȁnn fërtig gsii mìt Träng bìn Pionierȁinhȁite. Nù no di ȁigetliche Trängkolonne hȁnd vo doo aa no Ross ghaa. Es sìnd mer ì schpȍȍtere Jooren emool ehemooligi Fùnkerkoleege verkoo, wo’s grad ùs eme WK hȁi sìnd. Ȁis Gjȍȍmer ìscht gsii, ùnd mer hȁt mìr schier wele Vorwȕrff mache, wìll kȁi Träng me ì der Kùmpenii seig. Aaschiined hȁt mer aber vergȁsse ghaa, bì de Brigaade d Trängkolonen aazfordere. Jede Maa! Au Off ùnd Uoff hebid müese sȁlber ad Rääf ùnd ase de ganz Karsùmpel ìd Höger ue schlȁike. Ȁigetli hȁt mi das dȁnn gfreut, wìll di abschetzige Schprȕch wȁg öiserne ›Heubüüch‹ nonig vergȁsse gsii sìnd. Ase hȁt halt e totaali Motorisierig ìmmer no ìri Tȕcke, ùnd es schiint mer au rȁcht esoo. De Mȁntsch chönnti sùscht liecht ùf d ldee choo, es seig mìt de Tëchnik ales machbaar.
[ 60 ]