Wër hȁt die Websiite gmacht?
Gerhard Schaufelberger
Unterer Bönlerweg 24
CH-8624 Grüt ZH
+41 (0)76 468 16 25
Mini Biografii
Ich bin im 1964i z Wald ìm Zȕri Oberland uf d Wȁlt choo ùnd ùf em Hoof Ghȁischt als jȕngschte Soon vom Hërmi Schufelberger ùnd der Elsi Schufelberger-Hueber uufgwachse. Nach de Sekùndaarschuel hani e Schtìfti als Automëchaaniker gmacht. Wìll i ȁigetli scho ìmmer e choge Freud a de Schproochen ùnd a de Grammatik (und, esoo hȁnds ȁmel gsȁit, au es Talȁnt defȕȕr) ghaa han, bìni aber scho mit 22i wìder ìd Schuel, a de KME z Zȕri go d Matuur noohole, ùnd ha dȁnn no vo 1989-1997 a der Uni vergliichendi indogermanischi Schproochwȕsseschaft schtudiert (d.h. tooti Schprooche, vor alem Altgriechisch, Latiinisch ùnd Altìndisch). Dȁnn bìni öppe 20 Joor lang ì verschìdenen IT-Fìrmene täätig gsii, vorwieged als tëchnische Redakter ùnd dȁnn au als Syschteemadminischtraator. Hȕt heb i mi mìt ere Tȁilziitschtell als Wȁchter bì de Securitas ùnd glȁgetli au als Chùchighìlf ȕber Wasser. Nȁbetie schaffi aber au no sȁlbschtȁndig im IT-Berȁich ùnd ìm Support fȕr Privaataawȁnder vo Linux-PC-Syschteem.
Mìt welne Wërchzüüg ìsch die Siite gmacht?
Die Websiiten ìsch zù 100% mìt «Open Source Software» ërschtellt woorde, notüürli ùfeme Linux-Syschteem.
Schpeziell wetti doo de folgeden Organisazioonen ùnd de Lüüt tanke, wo defȕr soorged, das die Software wiiterentwìcklet ùnd ìmmer besser wììrt. Ooni die wäär mis Projȁkt nöd eso ȁifach z Schtand choo:
- LinuxMint
- En extreem robuschts ùnd zueverlässigs Betrììbssyschteem, woni scho sìd öppe 15 Joor bruuchen ùnd allne Lüüt empfìle, wo vo Microsoft oder Apple wȁnd ùnabhȁngig wëërde.
- LibreOffice
- En Office-Suite wo mìt Abschtand di bescht Alternatiive fȕr Microsoft Office ìsch.
- Calibre
- Es super Wërchzüüg, wo mer demìt ganz ȁifach ùs Libre-Office Teggscht-Dokumȁnt chan E-Books mache.
- WordPress
- Es wȁltwiit verbrȁitets Content-Management/Blog Syschteem. Doodrùff lauft die Websiite.
Ùnd jetz no chli Schliichwëërbig...
Wȁnn Si sȁlber e Websiite bruuched für Ìri Fìrma oder für Sii prìvaat, dȁnn sìnd Si bì mììr, bzw. bì miinere Fìrma a de rìchtigen Adrȁsse. Au wȁnn Si Hìlf bìm Verfassen ùnd Publiziere vo Ìrnen ȁigne Teggscht bruuched, chani Ìne hȁlffe debii. Wiiteri Ìnformazioone zù allne mine Dienschtlȁischtige fìnded Si ùf miinere Siite BuchSupport.ch.
Die Siite wììrt betrìben ùfeme Server vo de cyon GmbH z Basel. Das ìsch min langjȍȍrigen ùnd absolut zueverlässige Hosting-Provider, ich chan en wȕrkli mìt guetem Gwȕssen empfele!
Daateschùtzërchläärig
Ùf de Websiite https://hermann-schaufelberger.ch wëërded ekȁi «Cookies» (oder selli sȁge Guetsli?) verwȁndet, ùssert ìm Kontaktformulaar (hCaptcha Sìcherhȁitselemȁnt) ùnd ùf de Siite mìt em Schpȁndechnopf vo PayPal. Ich sammlen au ȕberhaupt ekȁi Bìnùtzerdaate, wo dùr di sȁbe Cookies erfasst wëërded. Wȁnn Si gnäuer wȁnd wȕsse, was PayPal ùnd hCaptcha mìt ìrne Cookie-Daate macht, dȁnn chönd Si daas bì dene go noowelȁse:
hCaptcha Daateschùtzerchläärig
Wȁnn Si mìr e Mittȁilig via Kontaktformulaar schìcked, dȁnn bliibt daas wo Si gschrìbe hȁnd ùnder öis, das hȁisst, ich gìben ùnder kȁinen Ùmschtȁnd Ìri Daaten a anderi Parteie wiiter.
Wȁnn Si mìr e Schpȁnd via PayPal oder anderi Kanȁȁl schicked, dȁnn chönd Si aagëë, ob Si ùf de Websiiten als Schpȁnder wetted erwäänt wërden oder nööd. Ich halte mich ùf jede Fall a die Aawiisig. Wȁnn's mer aber emool setti passiere, das i öpperem siin Namen ùs Verseeë publiziere, dȁnn reklamiered Si bìtte sofort, ich wȕȕrd dȁnn dë Fëëler sofort korigiere!
Au Ìri Adrȁss- oder E-Mail-Daate gìb ich niemertem wiiter, ùnd Si chömed vo mììr nùr dȁnn Mail ȕber, wȁnn Si daas uusdrȕckli wȕnsched dùrs Aachrützle vom entschprȁchede Chȁschtli ìm Kontaktformulaar.