De Hërmann Schufelberger (1926 - 2015), «de Ghȁischt Hërmi», ìsch ì de föifte Gȁnerazioon Puur ùf em Hoof «Ghȁischt» gsii. Dë Hoof ìsch sìd em 13. Joorhùndert bìkannt, und liit fasch z oberscht im Taal zwȕschet de Schȁidegg und em Farner, grad a de Kantonsgrȁnze zwȕschet Zȕri ùnd Sanggalle.
Wo de Hërmi vor mee als 70 Joore bìm Ruedi Chȁgi, em Mùndartautoor vo Tann, ì de Landwìrtschaftliche Wìnterschuel z Wetziken ìm Tütschunterricht gsii ìsch, hȁt en dëë dezue aagregt, er sell doch Noditzen ùf Zȕritütsch aafä machen ùnd esoo dezue biitrȁȁge, das d Schprooch ùnd Bìgȁbehȁite vo früener nöd vergȁsse gönd. Am Aafang ùf em bìligschte Papiir wo mer ȕberchoo hȁt — Makulatuurblock vo de Buechtrùckerei Hess, wo doozmool s «Volksblatt vom Bachtel» trùckt woorden ìsch. Di mȁischte vo dene Siite sind hȕt verlooren oder vergìlbt, aber de Hermi hȁt's zum Glȕck schpȍȍter ùf ere mëchaanische Schriibmaschìnen abtippet, ùnd drùm lȁbed di mȁischte vo dene Teggscht hȕt ì sine Büecher wiiter.
Won er ìs Rȁntenalter choo ìsch, sind die Sache nȁmli wìder aktuell woorde, ùnd de Pio Meyer vo de Fabrìk ìm Saagerȁi hȁt's ì de Nünzger Joor mögli gmacht, das's ì de sȁchs Bȁndli vo de Rȁȁje «Walder Erinnerungen» publiziert woorde sìnd. S sìbete Bȁndli «Kalenderblätter aus 70 Jahren» mìt Chùùrzgschìchte, wie's früener i de Volkskalȁndere trùckt woorde sìnd, hȁt de Ghȁischt Hermann ìm 2003 sȁlber useggëë. Es ìsch den Ȁnkelchìnd ìm Ghȁischt gwìdmet gsii.
Iich han dȁnn ì de Joore 2013 und 14 no zwȁi wiiteri Büecher vom Vatter useggëë: «Gschichte vo Geschter und Vorgeschter» und «Früe im Joor». Ì dene fìndt mer tȁils alti Teggscht won er ìm hööchen Alter nomool erwiiteret ùnd verbesseret hȁt, tȁils aber au Gedìcht ùnd Gschìchte wo vorhër nonig publiziert woorde sìnd.
Vìll vo s Hërmis Teggscht gȁnd sini Erìnnerigen a Bìgȁbehȁite vo früenere Ziite wìder. Aber au schpontaani Ȕberleggigen ùs sim Alltaag ùnd au en Huuffe Gedìcht zùm Lauf vo de Ziit ùnd zum Doosii hȁt er verfasst. Ùnd z letscht, aber nöd z vergȁsse sìnd sini vìle Porträ vo bìkannten ùnd au weniger bìkannte Lüüten ùs siiner Hȁimetgmȁind ùnd mȁngi Bìschriibig vo alte Handwërch ùnd Brüüch es Zȕgnis vonere Ziit, wo mȁngs no ȁifacher, aber nöd öppen ales besser gsii ìsch als hȕt.
Wo sin Soon Robert ghüroote hȁt im 1987i ùnd de Hoof vo den Elteren ȕbernoo, ìsch de Hërmi mìt de Frau Elsi ìs Doorf abe zȕglet. Deet hȁt er bìs zù de Pangsionierig als Ìnduschtriiarbȁiter gschaffet. Gwont hȁt er bìs zù sim Tood (Dezȁmber 2015) ìmene Block am Schiiblirȁi.
Wërch vom Ghȁischt Hërmi
Walder Erinnerungen I (1994), II (1995), III (1996),
IV (1997), V (1998)
Gedanken und Erinnerungen vom Gheischt Hermann
Bioengineering AG:1994-1998, Wald ZH
BuchSupport.ch: 2024, Grüt ZH (Gsammleti Wërch vom Ghȁischt Hërmi)
Eigenverlag: 2003, Wald ZH
Gschichte vo Geschter und Vorgeschter
BuchSupport.ch: 2013, Wald ZH
Zweite, verbesserte Auflage 2015
Dritte Auflage 2018
Nomool es Hȁmpfeli Gìdìcht und Gschìchte
ì de Mùndaart vom Zȕri Oberland
zȁmegriimet ùnd uufgschrìbe vom Ghȁischt Hermann
BuchSupport.ch: November 2014, Wald ZH