De Schȁnkel ìm Fȁlmis ìscht nȕd e Persoon, aber es alts Puurehuus gsii. Kȁnne tueni zwoor dë alt gschìndlet Flaarz mìt em Chlȁbtȁchli ùnd de Zùùgbȁlen an Fȁischtere nùr von eren alte Foti, öppe vom Nüünzȁhùndertsȁchzȁȁni, won scho ùf de Weschtsiite mìt em Abbrùch vo der vordere Wonig s Ȁnd vo dem woorschiindli uuralte Puurehuus aagfoo gsii ìscht. Won ich ìm 26i ìm Ghȁischt mii Lȁȁbesrȁis aatrȁte hȁ, ìscht vom ganze Hȁime nù no de Namen ùmegsii, ùnd wììrt ìm Chaufbrief vo s Schuemacher Peters ìm Fȁlmis vìlìcht no Joori ȕberduure. Ìm Schȁnkel hȁnd, sìd öppen em 1890i, der Albert ùnd d Berta Chuenz-Chuenz gwont. Der Albert Chuenz ìscht Staatsföörschter ìm Quȁllgìbiet vo der Tööss gsii. Die Föörschterei ìscht dȁnn no siim Rȕcktrìtt ìm Beicher, ùnd schpȍȍter ìm Föörschterhuus ùf der Schtroolegg bìhȁimatet gsii. Ìm Schȁnkel ìsch aber ìm ùnderschte Schtock, em Wȁȁg aa, d Fȁlmis Chääsi bìtrìbe woorde. Miin Grosvatter, der Albert Schufelberger-Hess, hȁt deet bìs ìm 1894i d Mìlch vo der Umgȁbig verchääset. D Tante Berta ìm Hȁitertaal hȁt amel verzelt, wȁnn de Wisiköbel, de Noofolger vom Grosvatter, d Chäässchruuben aazoge heig, hebs s ganz Huus uuf gäächzet ùnd ggiiret. Nù heb mer ìm Wìnter ùnenue au ìmmer schöön waarm ghaa, wȁnn de Chääser rȁcht ùndereghȁizt heb. Ùf der alte Foti gseet mer aber ȁ no, das ùf de Bëërgsiiten e zìmli groossi Schüür aabboue gsii ìscht. Die hȁt zù s Chuenze Schaagge Hȁime ghöört ùnd ìscht voorig woorde, won de Föörschter echli ob de Gass zue e nöiji bboue hȁt. D Huusschtȁȁge vom Schȁnkel, drei wackeri Sandschtȁitrìtt, sìnd no em Abbruch vom alte Huus ìm Ghȁischt bìs hȕt no erhalte. Ùf de Foti vom Schȁnkel sìnd di mìttlere zwee Söön vo s Föörschters, dezue de Schaaggeköbi, der Ernscht ùnd de Kobi Peter ùs der Schtȁiwȁid. Ì der Fȁlmis-Chääsi ìscht no em alte Sȁnntebuech, won lȁider scho vor Joore bìm Huusumbou, samt em Chäästhërmomeeter ùnd de Mìlchwoog zùm Bìschtìme vom Fettghalt, verschwùnden ìscht, mȁischtens halbfȁisse Chääs gmacht woorde. Der abgnoo Nidel ìscht ganknet ùnd zùm Tȁil z Wald ùne verchauft woorde.
[ 19 ]