Scho ìn vierzger Joore hȁts ìm Hüebli emool e Bȕrgerversammlig ggëë, mìt em Aalìgen ad Gmȁind‚ ì dëren Ùssewacht wie em ȁnere Bëërg e Schtroossebìlüüchtig z mache. I mag mi erìnnere, das dȁnn no de Frìdrìch Elmer d Fabrik ì de Chüewȁid ùne vertrȁte hȁt, wìll di sȁb Ziit no verschìdni Hüebler, hauptsȁchli Fraue, ì de Wȁȁbereie z Wald ùne gschaffet hȁnd. D Wasserversoorgigsgnosseschaft ìscht doo bìuuftrȁit woorde, Mìttel ùnd Wȁȁg z fìnde, zùm die Sach verwȕrkliche. Wìll d Gmȁind kȁi Gȁlt ghaa hȁt, ìsch das Aasìne bald ìrged ìnere Schublaade verschwùnde. Ȁinzig ùf em Platz vor em Schuelhuus ìscht ì der Folg e Latëërne montiert woorde, ùnd hȕt ìm Ziitalter vom Auto lauft znacht scho bald niemert me ùf Wald abe. Won i dëre Schtroossebìlüüchtig noowegsùne han, ìsch mer e Bìgȁȁbehȁit, wo früener ì de Famìlie bìm Verzelen ìmmer Hȁiterkȁit uusglööst hȁt, wìder z Sìnn choo. Zwoo Schwöschtere vom Vatter hȁnd en Schatz ghaa, der ȁint ìsch ìm Ghȁischt bì der Ida am Liechtere gsii, ùnd der ander hȁt ìri Schwöschter bìs an Ghȁischtbach ane hȁibbroocht, deet aber, vìlìcht ùs Reschpȁkt vor em Grosvatter, wìder de Hȁiwȁȁg ùf Wald aben aatrȁte. Wo de ›Buume Hangeri‹ ghöört hȁt, siin Koleeg seig au grad ùf em Wȁȁg ùf Wald abe, hȁt er si hantli verabschìdet ùnd hȁt ghofft, esoo nȕd elȁi de Wȁȁg ìs Doorf abe z mache. Der ander hȁt aber schiints nȕd rȁcht reagiert ùnd gmȁint, de Ghȁischt Albert well ìnn verjage. Er hȁt aafoo traabe, so rasch as er hȁt chöne, ìmmer hùndert Meeter siim Verfolger voruus. Nienet ùnderwȁgs hȁts näume Liecht ghaa bìs ìd Chüewȁid abe, deet heb er dȁnn bì der eerschte Latërne gmërkt, das dëë won ìmm eso tìfig hìnedriigschprùngen ìscht, jo ȁigetli sin beschte Koleeg seig. Janù, si sìnd dȁnn nȕmen ìm Iiltȁmpo mìtenand ìs Doorf abe gloffen ùnd hȁnd schiinbaar schpȍȍter no öppenemool es Gaudi ghaa, wȁnn d Reed ùf die Verfolgigsjagd choo ìscht.
[ 18 ]