Bìvor mer Allraadtraktoore ghaa hȁt, ìscht ìmmer dȁnn, wȁmmer mìt de Zùùgtiere nȕme dùrechoo ìscht, ìd Schȁidegg ùnd ìd Poo hìndere vo Hand de Wȁȁg usegschuflet woorde. I bsìnn mi no guet, wie mer öppe gȁge d Schȁidegg ue em Schnee schufle gsii sìnd. Woorschiindli ȁis von letschte Mool no, wo mer sùscht scho mìt em Pulax pfaadet hȁt. Sȁb Mool ìsches aber eso verbloose gsii, vome Nordweschtwìnd, won fascht e Wùche lang ìmmer nöie Schnee hëregrüert hȁt. An Schtroosserȁnder ìsches fascht oober gsii, aber ìm Siitegraben ȁne, do ìsch zwee Meter tüüff härtbbloosnen ùnd ȁ no zȁmegfroorne drȁckige Nöischnee glȁȁge, wo mìt ere Holzschuflen ȕberhaupt nüüt mee z mache gsii ìscht. Es sìnd dȁnn öppen öisere sȁchs Maa draaggange, ȕber d Wolfsgrueb ue bìs zù de groosse Buech ì der Ùnderschȁidegg ùnd dȁnn wìder vom Schääf aa bìs ìs Schȁidegghuus ue de Schnee ùs de Schtrooss usezschuflen ùnd ùf d Wienacht Schlìttwȁȁg z mache. S Zwȕscheschtùck vo de Buech bìs ìn Schääf ue sìnd nù verȁinzlet Wäächtele usezschufle gsii, de Reschte hȁt mer mìt em Pfaadschlìtte möge trùcke. Näächzue zwee Taag ìscht gschafft woorde, ùnd em zwȁite Nomittaag hȁt de Schnyder Bërni ȁntli mögen obenabe mìt siim Pulax, zùm ìm Fȁlmis ùne Noochschuub a Tranksaami fȕr d Wììrtschaft go hole. Aber scho ùf em Hȁiwȁȁg wäär er ooni Sȁilwìnde scho nȕme ganz hȁi ue choo. No zwȁi Mool heb er di sȁb Nacht müese pfaade, zùm nù ȁinigermaasse de Wȁȁg bìs ìn Maarchschtȁi aben offe z phalte. Doo hȁts ebe ȁ no rȁchti Wìnter ggëë, ùnd wùchelang hȁt mer chöne vo der Schȁidegg bìs ìd Zùberibrugg abeschlìttne, schööner nȕtzti nüüt. Es sìnd ȁ fascht kȁi Auto gfaare, wo mer druuf hȁt müesen uufpasse ùnd nȁbetuus ìscht au chuum öpper choo, wìll’s ùf beed Siite vo de Schtrooss zȕmpftig Pfaadmuure ghaa hȁt. Esoo sìnd dȁnn ȁ ìmmer e Gschaar Schlìttner ùnderwȁgs gsii. Em hërrligschten ìscht eso e Schȁideggschlìttnete z Nacht bìm Mooschii gsii ùnd hȁt au ìmmer vìll Walder aazoge, schpȍȍter mìt den Auto ȁ Lüüt ùs de wiiteren Ùmgȁbig ùs em Oberland.
[ 39 ]