Bìs ìm 1932i ìscht ìm Ghȁischt s Biilihuus no vier Meter nȍȍcher em Huus gschtande, ùnd d Mueter hȁt’s mȁngmool ìm Gaarte schwìrig ghaa zùm Schaffe. Hauptsȁchli dȁnn wȁnn’s blȍȍschtig Wȁtter ùnd ȁben ȁigetli au am wȁchsigschte fȕr de Gaarte gsii ìsch, ìscht si ìmmer wìder ùs em Gaarte vertrìbe woorde. Drùm hȁt de Vatter dȁnn zwee Meter vors alt Hüüsli e nöis bboue. Vom Schüürebou ìm Vierezwȁnzgi hȁts no en Huuffen Ablȁden ùmeghaa, das ëër nù no d Bȁlkli hȁt mȕse lo saagen ùnd dȁnn ìm Hërbscht efängs d Söckel hȁt chöne muure. No vor der Wienacht ìscht dȁnn de Roobou gschtande, ùnd de Schpȁngler Sutter hȁt d Tachchȁngel ufegnaglet ùnd mìt Eternit teckt. Es ìscht dȁnn aber en uusnaams schtrȁnge Wìnter woorde, ùnd mer hȁt drùm d Biilichȁschten au eerscht gȁge de Früelig ane chöne zȕgle. Doo derbii hȁt au min Grosvatter Albert no wacker ghùlffen ùnd dȁnn au es Joor bì siiner liebschte Bìschȁftigung chöne mìtmache. Au iich bìn doo mȁischtens debii gsii ùnd hȁn vo ìmm no mȁngs erfaare, bsùnderbaar aber ȕber di früeneri Ìmkerete, wo bìs ìd 1880er Joor no uusschliessli mìt Schtroochöörb bbeielet woorden ìscht. Dȁnn hebi zeerscht sin Brüeder Gottfried, wo z Laupe Leerer gsii ìscht, die nöie Schwizerchȁschte zuetoo, ùnd dȁnn au Vatter ùnd Brüeder ìm Ghȁischt chöne vo dëre Nöjerig ȕberzüüge. Die Biilichȁschte sìnd au ìmmer sȁlber gmacht woorde, ùnd ich sȁlber bìn dȁnn der eerscht gsii, won emool sȁchs Toppelbüten Oggasioon gchauft hȁt. Wo dȁnn s Vatters Brüeder Albert z Wërnetshuuse gschtoorben ìscht, hȁt mer 120 Meter wiiters ùne no es nöis Hüüsli an Waldrand ane bbout, zùm di sȁbe Völcher au chönen ùnderbrìnge. Ase sìnd dȁnn mȁngs Joor 40–60 Ìmd bìtreut woorden ùnd hȁnd au mȁngmool gueti Ërträäg a Hùng bbroocht.
Es ìscht ȁigenaartig gsii, wie ùnderschìdli der Ërtraag ì dene zwȁi Biilihüüser gsii ìscht. S ȁint Joor ìscht ìm obere vìll besser gsii, ùnd es hȁnd sich au d Völcher rascher vergröösseret, ùnd scho ìm näächschte hȁts wìder ganz anderscht chönen uusgsee. Fascht echli en Abschtùùrz ìsch aber s Träniere vo den anderthalb Hektaare Riet grad nȁbet ùnd hìnder öiserem Huus fȕr d Biili woorde. Ìm Dùrchschnìtt von Joore ìscht sìcher pro Volch föif Kilo weniger Hùng zùm Schlüüdere gsii. Es hȁt aber au, wie das früener nie de Fall gsii seig, en Sùmmer ggëë wo mer gaar kȁi oder ganz wenig Ërtraag ghaa hȁt. Es ìscht aber nȕd elȁige wȁge de Blueme wo jetzt nȕme bblüet hȁnd gsii. Vìll ee ìscht aber, ich wett em doo sȁge ›s Mìkrokliima‹ derfȕȕr verantwortli, wìll’s ìme trochne Sùmmer fascht kȁi Tau me gìt, wo mìt em Riet zȁmen ìmmer derfȕȕr gsoorget hȁt, das de Hùngtau vo de Tane wenigschtens am Vormittag hȁt chöne gsammlet wëërde.