Min Götti Albert Schufelberger, Leerer z Wërnetshuusen ȁne, ìscht en ebesoguete Bëërggȁnger wien en Botaaniker und Pilzkȁnner gsii. Wȁmmer ìm Sùmmer ìn Töössuurwald hìndere, oder ùf ȁine von ùmlìgede Höger ggange sìnd, hȁt ëër ìmmer es ›Poschternetz‹ ìm Hosesack mìttrȁit zùm allfeligi Schwȁmm mìthȁiznëë. Ase wȁiss ich, das mer ì der hìndere Rüti, deet grad ùnder em Farner zue, es ganzes Netz vole Pfìfferlig (Ȁierschwȁmm) gfùnde hȁnd. Das hȁt em Oobig ìm Ghȁischt ùnd ìm Wërnetshuuser Schuelhuus en hërrliche Znacht ggëë.
S Schwȁmitȁȁli ie, deert gȁge d Hȕbschegg ufe, sìnd emool, wìll kȁi anders Gschììr vorhande, s Vatters ùnd s Göttis Huet voll Schwȁmm mìthȁignoo woorde. Doo sìnds aber Rȁizker ùnd Parasool gsii, will sȁȁge Schìrmlig, won bbrȍȍtlet ase hërrli gschmöckt hȁnd.
Di beede Förewȁldli ìm Geer und ì s ›Schaaggen‹ obe sìnd wȁg de guete Schtȁipìlz ùnd Maroneröörlig ìmmer öppen ìm Noosùmmer abgsuecht woorde. D Plȁtz wo’s Moorchle ghaa hȁt sìnd ìmmer möglichscht ghȁimghaa worde, sùscht hetti mer jo sȁlber liecht chöne s Noosee haa.
Es ìscht schaad, das ì der hȕtige Zitt nù no ì ganz wenige Joore vìll Schwȁmm wachsed, di beschten aber, d Pfìfferlig, em Aaschii noowe bì öis fascht ganz verschwùnde sìnd. Hȁt mer doch amel dùr d Böden ùnd Chalberwȁid hìndere, deert vor Hesse zue, fascht jedes Joor en rȁchte Huuffe Schwȁmm chöne hole.
Vo mim Götti, won lȁider scho Mìtti Driissgerjoor gschtoorben ìscht, hȁni no mìt ùf de Lȁbeswȁȁg ȕberchoo, wie mer Schwȁmm schooned ab de Myzeel ìm Boden ìne tuet sammle, ùnd das mer ìmmer setti di eltschten Exȁmplar lo schtoo, das die ìri Schporen ùf em Waldbode chönd verschtreuen ùnd asen au schpȍȍtere ›Schwȁmmler‹ au no wìder e Freud chönd mache.
Mini Mueter hȁt aber nù Freud ghaa, wȁmmer Moorchle hȁibbroocht hȁnd. Di andere hȁt si nȕd bbroote, verschwìge dȁnn ggȁsse devoo. Drùm sìnd di anderen ȁbe von Mane gchochet woorde, ùnd Buuchwee hȁt detwȁge niemert ȕberchoo.
Hȕt ìscht aber s Schwȁmm Sueche scho bald e Wȕsseschaft, wìll nȁmli jede Kantoon anderi Ziite fȕr de Schùtz feschtglȁit hȁt.