Au daas hȁts ìm Hüebli ggëë
Ìm 1932i ìscht e Famìlie Sìgner vo Zȕri hëër ìs Hüebli zȕglet ùnd hȁt doo s Hȁime vom Halbheere Schaagg ì der Oo ì Pacht gnoo. Die Famìlie hȁt sìbe Chìnd ghaa, der eltschti Soon ìscht scho ùs der Schuel choo. D Mueter Sìgner ìscht e fliissigi Schtìckeri gsii, ùnd i wett wooge z bìhaupte, sìcher doozmool ȁini vùn bìkannteschten Appezȁllerschtìckerìnen ȕberhaupt. Ìres Bìld hȁt langi Joor di schwizerisch 500er Noote gschmȕckt. Ùf der hìndere Siite sìnd e ganzi Grùppe Schtìckerìne z gsee gsii, ùf der anderen aber es Medäijon mìt em Brùschtbìld vo de Hüeblischtìckeri, als 22-jȍȍrigs Mȁitli. Ich hȁ ì allne sìbe Joore, wo die Famìlien ìm Hüebli gsii ìscht, d Frau Sìgner nie ùsser Huus gsee. Nur ìm Sùmmer, wȁnn’s schöön ùnd waarm gsii ìscht, hȁt sii ìren Schtìckraamen ùf em Brȕggli ùssen uufgschtelt. Es ìscht e woori Freud gsii, zuezluege, wien ȁmsig ìri gìchtchranke Hȁnd mìt em fiine Nȍȍdeli gschpìlt ùnd hërrligi Schtìckerei gschaffe hȁnd. Ich hȁ vom eltschte Soon, em Sepp, vernoo, das hauptsȁchli fȕr Schtadtzȕȕrcher Jude gschaffet woorden ìscht. Glaub ganz vìll Monogramm fȕr tüüri Sache sìnd doo gschtìckt woorde. Aber, so hȁni ghöört, au di eerschte Klùpabzȁiche vùm Walder Schiiklùp sìnd ì der Oo vornen entschtande. I hȁn aber au vernoo, das d Hüebli Schtìckeri ì jùnge Joore böös chrank, Glȁnkrheuma ghaa hȁt ùnd es paar Joor chuum me hȁt chöne lauffe. Mìt emen iserne Wìllen ùnd Freud am Schtìcke hȁt sii aber ales Lȁidi chönen ewȁggschtecke. Mìt bald 30 Joore hȁt si dȁnn ghürooten ùnd hȁt dȁnn au no tȍȍrffe zwȁi Mȁitli ùnd föif Buebe haa. D Famìlie, s Schtìcke ùnd schööni Sache gschtalte sìnd dȁnn au de Maria Sìgner ȁis ùnd alles gsii. Vìli Sachen ùnd Bìgȁbehȁite bliibed lang ì öiseren Erìnnerig. Aber zùm die Schtìckeri nȕd ganz vergȁsse loo, seled die paar Ziile s Aadȁnke fȕr wiiteri Joor bìwoore.
[ 35 ]