Von 1890er bìs Aafang daas Jorhùndert sìnd bì der Töössverbouig en Huuffen Italiëëner bìschȁftiget gsii. Ìre Vooraarbȁiter ìscht bìm Wȁȁgbou ìm Töössgìbiet ùme der Albert Chuenz ìm Schȁnkel ìm Fȁlmis ȁne gsii. Jetz wȁnn de Heuet noowe gsii ìscht, hȁt de Förschter öppe di zwee beschte vo siinen Aarbȁiter mìthȁibbroocht zùm Hȁlffe. Es sìnd jo dȁnn s mȁischt Bërgamasker ùnd Vȁltliiner gsii, won dihȁimen ìm Süüden au mìt em Puure z tue ghaa hȁnd. Esoo sìnd au der Angelo ùnd siin Brüeder Giuseppe ìm Fȁlmis em Heue gsii ùnd hȁnd dete gȁges Albërte dùre, zwȕschet de doozmoolige Wȁidschüüren ufe müese määje. Debii hȁt der Angelo ìme Baum ìnen es Vogelnȁschtli entdeckt ùnd schiints, wie das bìn ìmm dihȁime gang ùnd gääb gsii ìscht, Glùscht ùf ›Utschelli‹ ȕberchoo. Item, die zwee Brüedere hȁnd das Nȁschtli uusgnoo ùnd eme Füürii die Vögeli bbroote. Potz Blìtz hȁt doo de Vetter Förschter müese reseniere! Wȁnn nȕd d Tante Bërta gsii wäär, die zwee Salvedoore hetted schtantepeedi chönen ìres Wȁȁrli phacken ùnd Rìchtig Süüde verrȁise. Esoo hȁts dȁnn schiints nù es Tùnnerwȁtter abgsetzt, ùnd die zwee Muratoori heiged hööch ùnd hȁilig verschproche, nie me ›Utschelli‹ z broote!
[ 24 ]