Mer chönnt mìr vìlìcht noowesȁge, i seig en wȁltfrönde Träumer oder eso äändli, wìll vìli vo mine Gschìchten ùs em letschten oder gaar em vorletschte Joorhùndert schtamed. Aber der Aaschtooss derzue, ȕberhaupt die Sachen uufzschriibe, chùnnt ȁbe doo dervoo, as ich scho als jùnge Puur gmërkt hȁn, das vìles ùnd dermìt au d Schprooch mìt der Ziit verloore goot.
Dëëwȁȁg hȁni scho ì jùnge Jooren afää Bìgȁbehȁiten ùnd grad emool ìn Sìnn chooni Vërs uufzschriibe. Em Aafang gaar ùf em bìlligschte Papiir wo z haa gsii ìscht, Makulatuur vom ›Volksblatt vom Bachtel‹, wo mer bìm Blettli-Trùcker Hess ìm Gueteberg zùm ene Block vo 100 Siite bbùnde fȕr wenig Gȁlt hȁt chöne poschte. Ase hȁts bì mììr ìmen alten Ordner ìnnen ìmmer no e Gschaar bìschrìbni Bletter wo mìt de Joore total vergìlbet sìnd. Die ethalted aber noo wie voor wìchtigi Gìdankenaaschtööss ùnd Worete, wo no lang mönd gȕltig sii. Drùm hȁn ich au ìmmer wìder chöne druuf zrùgggriiffe, wo schtatt em Bleiwiiss e Woodstock, ùnd schpȍȍter e portaabli Schriibmaschine de Dienscht too hȁt. Do ìscht dȁnn aber de Tochter ìri elȁktrisch vo de Migros ùnd sìt sìbe Jooren es Laptop mìt Trùcker ùf em Schriibtìsch ùf Abruef zùr Verfüegig gschtande. Ùf die Aart hȁni ȁben Ërìnnerigen ùnd Bìgȁbehȁiten ùf ìmmer modërneri Wiis chöne lȁsbaar mache.
Ùnd es wììrt mer’s hoffetli niemert chrùmm nëë, Sache wo sùscht verloore gönd au no de näächschten ùnd am beschten au ȕbernäächschte Gȁnerazioon z erhalte. Esoo chùmi dȁnn halt ìmmer wìder vo dem ùnd dìsem ì der Gmȁind Aaregigen ȕber wo sich looned ùfs Papiir z brìnge, so quaasi mȁngs Mool zùm öiseri Ziit, won lenger je hektischer woorden ìscht, ȕberduure. Ùnd es mag mer ìm ȁinten ùnd andere Fall scho gglùnge sii, öppen Anekdooten ùnd Ërȁignis de näächschte Gȁnerazioone wiiters z gëë. Die wääred sùscht no glii ùs em Sìnn ùnd vergȁsse.