Wùùrschtchrȍȍmer bìm Metzger Hotz
Mer hȁt vom Juli lsler gsȁit: «Ëër heb bìm Gȁneraalschtrȁik mìtgmacht ùnd seig dermìt ì der Buude voorig woorde!» Gwont hȁt ëër zeerscht ìm ›Roosegaarte‹, schpȍȍter dȁnn ì der Brȁitematt ùnen ùnd ìscht siis halb Lȁȁbe lang bìm Ërnscht Hotz ìm Taalegg Wùùrschtchrȍȍmer gsii. Ziischtig ùnd Fritig ìscht ëër ȕbers Oberholz - Fȁlmis go husiere mìt Wùùrschtwaare. Ùf Bschtellig hȁt er aber au öppen es Pöschtli Ghackets oder Süüdflȁisch bbroocht. Ìs Ghȁischt ìscht ëër zwoor nie choo, wìll mììr sìd langem em Zùberi sin Wùùrschtli Peter als Lìferant vo Wùùrschtwaare ghaa hȁnd, dë ìscht ìmmer em Mìttwùchen ì de Gȁgerìchtig ìm Oberholz ùnd ȕbers Fȁlmis mìt siire schwëëre Chrääzen em Rùgge go husiere. An Juli Isler bsìnn mi aber eender besser zrùgg, wìll mer ìnn ìmmer öppen echli gneckt hȁnd bìm Verkoo ùnd ëër au ìmmer öppe en bìssige Schprùch fȕr öis Goofe ghaa hȁt. Esoo ìsch mìr no ȁis ganz tüütli vor Auge, fascht wie wȁnn’s geschter gschee wäär. Wo Mìtti Driissger Joor de Franken abgwërtet woorden ìscht, hȁnd d Sërbila vo 25 ùf 30 Rappen uufgschlaage. Mìr Hüeblischüeler hȁnd ì der Folg de ›Wùùrschtli Isler‹ ìmmer müese necke: «Wievìll choscht jetzt au en 25er Sërbila?», hȁt mer de Juli amel gfrooget ùnd promt zùr Antwort ȕberchoo: «30 Rappe du Lappi!» Daas hȁt bìn öis notüürli ìmmer Hȁiterkȁit uusglööst, ùnd de Wùùrschtchrȍȍmer, wo jo nüüt hȁt chöne derfȕȕr, hȁt öisi Froog sìcher echli veräärgeret. Scho lang sìnd ì der Gmȁind ùmen ekȁi Wùùrschtchrȍȍmer me ùnderwȁgs, aber au ekȁi Becke, wo mìt Ross ùnd Fȁderewage vo Huus zù Huus Broot verhusiert hȁnd. D Mobilitäät vùn Lüüte hȁt’s mìt sich bbroocht, das all die Dienschtläischtige nȕme gfrooget sìnd. Au hȁts jo sìcher hȕt ì jedem Huus en Chüelschrank, das mer nȕme wie doozmool ùf frìschi Wȕȕrscht aagwìsen ìscht. Zùm Andere hȁnd sich au d Gwonete vom Volch eso schtarch verȁnderet, das bìn mȁischte Puure, aber au andere Lüüt, de früener obligaat Znüüni ussgloo wììrt. Esoo langets jo au de mȁischte Handwërcher, schtatt Znüüni en Kafi z nëë. Es seig dȁnn, mer heb kȁi Zmoorge ggȁsse!
[ 28 ]