No vor 70 Joore hȁts z Wald ìm Doorf en ›Sinner‹ ggëë. De Jakob Chȁgi ìm Schmìttebach ìscht Chüeffermȁischter gsii, ùnd ëër hȁt s Rȁcht ùnd der Uuftraag ghaa, ì öisere Gmȁind bì de Hoolmȁȁss Oornig z haa. Das ghȁisst, ali Fȁsser fȕr Wii, Moscht ùnd Pier sìnd von ìmm gȁicht woorde, derzue hȁt ëër aber ggȁichti Mȁssgräät, ùnd fȕr Fȁsser ganz wìchtig, en Brȁnnschtȁmpfel mìt siner persööndliche Nùmmere, zȁme mìt ›ZH‹ ùnd sinen Iniziaale ›JK‹ bbruucht. Demìt sìnd ali vo ìmm ùnd anderen ì der Gmȁind gmachte Fȁsser mìt der Ìnhaltsaagoob versee woorde. Zùm Holztausen ȁiche hȁt de Chüeffer Chȁgi früener verzìneti Chùpfernegel bbruucht. Fȕr Tausen ùs Ise (verzìnet) oder fȕr Mìlchchessel sìnd d Zȁichen ùnd Zaale mìt eme Satz Schtȁmpfel ùs Schtaal gschlage woorde.
Min Vatter hȁt gȁge Mìtti von Driissgerjoore bìm Chüeffer Chȁgi es nöis 190 Liter Süessmoschtfass mìt vier Santimeter tìcke Tuuge bschtelt. Am Herbschtmäärt vo sȁbem Joor hȁni tȍȍrffe mìt go luege, seb s nöiji Fass fȕr s Ghȁischt scho fërtig seig. Bìm Chȁgi hȁts doo e ganzi Rȁȁje nöiji Fass und Fȁssli ghaa, sìcher zwȕschet öppe 40 ùnd 500 Liter Ìnhalt, wo nù no hȁnd müese gȁicht ùnd dȁnn mìt gchochetem Liinööl aagschtrìche wëërde.
Ùf die Chüefferfamìlie bìni aber dȁnn au gschtoosse, won i vo der Chüewȁidfabrìk di alte Chauffbrief dùreglueget hȁn. D Honegger, Fischer und Co. hȁt vor 140 Joore vom Chüeffer Jakob Chȁgi ìm Schmìttebach es Schtùck Wald gchauft zùm s Wasser vom Bach ìd Wȁberegg ȕber en Chȁngel in nöje Fabrìkwejer uselȁite. Es müesst ase sìcher öppe drei, wȁnn nȕd mee Gȁnerazioone Chȁgi als Chüeffer ìm Schmìttebach ùnder em ›Zìpfel‹ ggëë haa. Ich hȁ mìr vor Joore vo alte Lüüte sȁȁge loo, das doo zùm Tȁil ganz groossi Fȁsser entschtande sìnd. Die hebi mer dȁnn aber fȕr de Transport ì Schtùck vo öppe föif Tuuge verlȁit as Oort transportiert ùnd deet ìm jewiilige Chȁller zȁmebboue. Ganz hetti mer’s jo nie chöne füere, verschwìge dȁnn ìn Chȁller abe brìnge.
Mich erschtuunts ìmmer wìder, ì groosse Chȁllereien alti und nöjeri, mȁngmool riich gschnìtzti Fȁsser mìt groossem Ìnhalt z gssee, wo sìcher vom groosse Chöne vom alte Chüeffergwërb züüged. Aber au dervoo, das de Bsìtzer die schööne Schtùck ȕber Joorzȁȁnti usen ìn Eere hȁt.
Dë letschti Chüeffer Chȁgi ìscht en alte Ledige gsii, won im ›Taalegg‹ ȁne zȁme mìt em Mooler Hotz, genannt ›Oskar Pìnselschtrìch‹, em Altaarschnìtzer Miconi ùnd andere zù de Schtammgescht vo de Frau Hotz ghöört hȁt.