Ì de Puurehüüser sìnd sìd alters hëër di alte Chȁschten ì Eere ghaa woorde. Woll hȁt ì jeder Gȁnerazioon d Frau e nöiji Uusschtüür ìs Huus bbroocht. Aber es sìnd jo ì dene Hüüsere zmȁischt föif bìs sȁchs Chammeren ùme gsii, sùscht hȁts au öppen ìme Gang oder ùf de Wìnde no Platz ghaa zùm en Chaschten uufschtele. Esoo sìnd bì öis ìm Ghäìscht en groosse gmooleten ùnd en äändli gmachte, mìt eme bruun gmoolete Maser ì de Nȁbetchammere gschtande. Dezue ìscht ì de Vorrootschammere hìnder de Chùchi en sìcher a di zwȁihùndert Joor alte groosse Chaschte gschtande. Dë ìscht ìmmer fȕr d Hùnghȁfe ùnd Gleser z versoorge bbruucht woorde. Do hȁts amel Chriesi-, Brùmbeeri-, Siiden- ùnd Santehansebeeri-, Zwȁtschgen- ùnd Pfluume-, dȁnn aber au Holderen- ùnd Moschthung ghaa.
Von alte Chȁschte hȁnd mer die zwee mìt de hööche gschwùngne Uufsȁtz ìmmer em beschte gfale. Der ȁint ìscht ȕber ali Joor uus ìmmer ìm chliine hìndere Chȁmmerli gschtande. Em Vatter sis Mìlitäärgwand ùnd mini Aaleggi, aber au Bett- ùnd Liibwösch ìscht drìn versoorget gsii.
Der Ueli Tìschhuuser hȁt ìn Sȁchzger ùnd Sìbezger Jooren e paar Puuremoolkȕrs glȁitet. Esoo hȁt mini Frau gfùnde, sii wett der alt Chaschten ì der hìndere Chammer moole. Zeerscht aber emool mìt eme weniger alten eso quaasi es Mùschterschtùck mache. Es sìnd dȁnn halt zwȁi Mùschterschtùck woorde, wìll ì de Zwȕscheziit di alti Almääri ì de Chùchi voorig woorden ìscht. Druuf hȁmmer dȁnn ùm Mìtti Sìbezger Joor ame föönige Wìntertaag de bruun Chaschten ìm Chìnderzìmmer uusgruumet ùnd usenandgnoo zùm Ablaugen ìn Schnee use gschtelt. Di alt Öölfarb hȁt no zääch ghebet, gliich ìscht noodisnoo efangs a de Tȕȕre daas drùnder fȕrechoo. Schier uusgflippt sìmmer! Ùnder de bruune Mooli ìscht e schööni Puuremoolerei fȕrechoo. Aber lȁider hȁt sich das drùnder liechter glööst als s Drȕbergschlììrpeti. Jetz ìscht guete Root tüür gsii, sobald nȁmli s Holz hȁt aafoo trȍchne, sìnd au d Motiiv mee ùnd mee verschwùnde. Esoo hȁmmer zȁme mìt de Chìnd mìt bruune ›Prìsmalo‹ ali Fȁlder bìs a ȁi Siitewand chöne noowezȁichne. Nochanen ìscht Fȁld ùm Fȁld ùf Pergamȁntpapiir ȕbertrȁit woorden ùnd demìt daas, wo doo vor vìle Joore gschaffe woorden ìscht, vor em Vergoo grettet. No em Ìmprägnieren ùnd Schpachtle – das ìscht nöötig gsii wìll zùm Tȁil rȁchti Bìck ìm Holz gsii sìnd – ìsch de ganz Chaschte bruun grùndiert woorde. Dȁnn hȁt mer di uurschprȕnglige Bìldmotiiv wìder chönen ùf di jewiilige Fȁlder uufzȁichne. Dȁnn hȁt mi Frau d Tȍȍrli ì de Freiziitwërchschtatt ùne, de Reschte dihȁime, ìm früenere Schtiil mìt Hëërdfarben uusgmoolet. Wìll’s chuum z mache wäär ì früenere Pìnseltëchnik der Uufsatz z moole, hȁt der Ueli [ 34 ] Tìschhuuser vorgschlaage, s Ganzi mìt eme Schprùch abzrùnde. ›Froh zu sein bedarf es wenig / und wer froh ist, ist ein König‹, zȁme mìt zwoo Ranke vo der alte Bìmoolig, gȁnd hȕt dem sìcher 200 Joor alte Mööbelschtùck e ganz bsùnderi Uusschtraalig. Dë gmooleti Chaschte schtoot hȕt bì öis ìm Doorf ùnen ùnd wììrt woll emool bì ȁim von Chìnde, vìlìcht au wìder ìm Ghȁischt obe, als Eerbschtùck wiitere Gȁnerazioone dienli sii.
I ha dȁnn ì de Folg a mȁngem Oort ì der Gmȁind ganz äändli gmooleti Chȁschte gsee. Vìli sìnd ìm gliiche Schtiil gmacht woorde. Es schiint mer gaar, doo mües ì lang vergangner Ziit öpper, vìlìcht ùf de Schtöör, bìn Lüüten eso Chȁschte gmoolet haa. Es ìscht mer nȁmli uufgfale, das di mȁischte mìt de gliiche Schablone zeerscht voorgrìtzt ùnd dȁnn mìt Klȁischterfarb ìn ere ooverkȁnnbaare Pìnseltëchnik uusgmolet sìnd. Lȁider hȁt aber kȁis vo allnen eso gschmȕckte Mööbel e Joorzaal draa. Mer chan nù an Schlösseren ùnd a de Machaard – ooni en isige Naagel draa – druuf schlüüsse, as die schööne Chȁschte ee scho vor de Napolionziit gschriineret woorde sìnd. Mȁnge dervoo mag ìn ere Grȕmpelchammer oder ùf de Wìnde vergammlet sii. Fȕr miich sìnd aber di erhaltnen alti Züüge von ere schööne püürliche Wonkultuur. No z erhalte was no doo ìscht, mues s Bìschtrȁbe vo den jetzige Bsìtzere sii. Chönnted doch di alte Schtùck Lȁȁbesgschìchte vo Gȁnerazioone vo Famìliene verzele. Vo Freuden ùnd Liide, Wëërden ùnd Vergoo ìn Puurehüüseren ìne.
[ 35 ]