I miinere Chammer ìsch ìn jùnge Jooren en Eerenuurkùnd vo der Landwìrtschaftlichen Uusschtelig 1900 z Wald ghanget. Die hȁt doozmool de Grosvatter fȕr Biilihùng ùnd Wachs ȕberchoo. Vo dëren Uusschtelig hani au ì andere Puurehüüser no Diploom gsee hange. Fȕr Zùchtvee wie au fȕr Obscht ùnd Gmües, derzue au vo andere landwìrtschaftligen Erzüügnis. Wald mues sȁbi Ziit au iniziatiivi Puure ghaa haa, won ìm landwìrtschaftlige Kantonaalverȁin aktiiv gsii sìnd. No em Verzele von alte Lüüte hȁt die Uusschtelig ùf der Ochsewìsen aagfangen ùnd sich bìs zù s Lȁtschen oder doozmool Oberholzers Fabrik ìn Schpìttel ùnder em ganze Doorf hìndere zoge. Das wäär hȕt öppe vo de Methodìschte-Chìle bìs zùm Willi Gachnang hìndere. Das mìr die Diploom wìder ìn Sìnn choo sìnd, hȁt aber en bsùndere Grùnd. I ha mìt miim Ùmeluege no alte Züüge vo der Ìnduschtrialisierig vom Doorf d Mȁinig ghaa, vor s Minnige Huus ìm Vorderwald obe schtöni no es Hüüsli, won amel s Oberholzers ìm Saagerȁi ghöört heb. Nù, i ha dȁnn vernoo, das dem ȕberhaupt nȕd esoo ìscht. Das Hüüsli ìscht d Iitrìttskasse vo de nüünzähùnderter Uusschtelig ùnd ìsch nochane schiints vome Honegger, Vatter vom Komponìscht Arthur Honegger, gchauft woorden ùnd doo ìm Vorderwald oben a siin nöie Platz versetzt. Es hȁt ùf drei Siite Schalter ghaa zùm Bìleet usegëë ùnd ìscht ȁigetli rȁcht duurhaft bboue gsii, sùscht hetts chuum ȕber 90 Joor mögen ȕberduure. S Huus, won das Kassehüüsli derzueghöört hȁt, ìscht vor vìle Joore vo de Füürweer als Üebigsobjȁkt bbruucht woorden ùnd dȁnn totaal abgschlìssen ùnd em Bode gliichgmacht. Mer mues grad scho schtudiere, wo’s au gschtande seig. Esoo goots jo ìm Lȁȁbe mìt vìllne Sache! Wȁnn’s nȕmen ùmesìnd, wëërdeds glii emool vergȁsse, ùnd wȁnn’s nȕd no Fotene oder Zȁichnige devoo gìt, chammer si glii e kȁis Bìld me dervoo mache, wie’s wȕrkli uusgsee hȁt, ùnd au d Lüüt, wo drìn gwont hȁnd, chömed ȁim nù no ìm Zȁmehang vo alter Erìnnerig wìder z Sìnn.
[ 15 ]