Dë Wìnter ìsch es mìr scho mȁngsmool uufgfale, wie vìll das i ìm Schmìttebach oder ì der Joone Wasseramsle gsee ha. Du hȁscht rȁcht ghöört, dëë Vogel ìscht nȁmli mȁischtens nȕd am Bach z fìnde, aber gwöndli zmìtzt drìnìne. Es ìscht ganz chùùrzwiilig, dem tìfige, scho öppen echli schüüche Vogel zueluege, wien er ìm Bach ìne schtoot ùnd deet mìt em Schnabel chliineri Schtȁi ùnder Wasser ùmcheert zùm d Laarve vù verschìdnen ìm Wasser lȁbeden Ìnsȁkte rìchtig chönen abwȁide. Zwȕschetie wììrt ìmmer wìder e chùùrzi Schtrecki ganz ùnder em chüele Nass dùregschwùme, wȁmmer gnau hërelueget, gseets zwoor uus, wie wȁnn de Vogel ìm Wasser flüüge wȕȕrd. Ȁnedraa usen ùnd es Bìtzeli gschȕttlet, ùnd d Wasseramsle ìscht wìder troche wie vorhër.
Em Zuukönig verwandt, ìscht d Wasseramslen en ȁigetliche Bìwoner vùn suubere Bëërgbȁch. Mer gseet si deert mȁischtens als Ȁinzelgȁnger oder dȁnn hööchschtens z zwȁite, ùnd ìmmer ì de gliichige Bachabschnìtt, ich wùùrd glaube, das’s doo e gnau abgschteckts Revier bìflüüged, ùnd wȁnn en frönden Aardgnoss ìs Gäu chùnt, wie de Zuukönig rȁcht ooghalte chönd bȁfflen ùnd schnùre. Öppe so ì de Gröössi von ere chliineren Amsle, aber mìt ddrùngnerem Körperbou, chreftigere Bȁi ùnd eme chùùrze, vìllmool ì der Aard vom Zuunkönig uufgschtellte Schwanz, ìscht dë tùnkelbruun Vogel mìt eme wiisse Latz, wo ùne rootbruun ùmrandet ìscht, nȕd mìt emen andere z verwȁchsle.
Bruete tuet d Wasseramsle gëërn ùnder eme Wasserfall oder ame gääche Bachpoort versteckt hìnder de Wùùrzle vome Baum. Bout deert groossi rùndi Nȁschter ì der Aart vùm chliinere Zuukönig. Das öppe wien en Tschutbölle groossi Nȁscht hȁt ìmmer en verschteckte Zuegang, ùnd au s Nȁscht ìscht ganz schwìrig zùm Fìnde, wìll de Vogel nie dìrȁkt dezueflüügt. Ich han als Bueb emool dùr en Zuefall eso es Nȁscht am ùssere Bach entdeckt ùnd hȁn mȁngs Mool müesen ùf d Luur goo, bìs i dùsse ghaa hȁ, wer doo ii ùnd uus goot. Was ȁim a de Wasseramslen uuffallt ìscht, das si fascht s ganz Joor sìngt. Zwoor nȕd es jubiliere wien en Amsle, aber mȁngmool langets gliich fȕr en Triller ùnd e paar meloodischi Pfiifftöön.
[ 41 ]