Es mues ì der Ziit gsii sii, won de Pfarrer Pfìschter z Wald gamtet hȁt. Dë hȁt ì siinen Erìnnerigen a die Gmȁind druuf hiigwìse, das es doozmool schwëër gsii ìscht, d Chìnderleerjuged vo de sìbe Wachte vo Wald, enere Bëërgmȁind ìm Oberland, ìm Zȕgel z haa. Dë Pfarrer Pfìschter ìscht dȁnn schpȍȍter en Mìtkȁmpfer vom Siegmund Freud ùnd andere ›Psychoanalytikere‹ woorde. Es mag jo scho zùm Tȁil zuetrȁffe, was dë hööchgleerti Maa doo gschrìbe hȁt. Sìnd doch dȁnnzmool nù grad d Sekundaarschüeler gmȁinsam ìs Doorf ìd Schuel ggange, sùscht hȁt mìt Uusnaam vo Plattebach jedi Wacht en ȁigni Achtklasseschuel ghaa. Eso ìsch mer ùs sȁbere Ziit es Mȕschterli bìkannt, won dë Pfarrherr, won jo zìmli sìcher ùs der Schtadt choo ìscht, scho echli hȁt chöne schockiere, bsùnderhȁitli wìll’s ì der Chìle passiert ìscht, no vor em Ȁnd von ere Predig. D Ùssewachtbuebe hȁnd bìm alte Sekundaarschuelhuus, gȁgenȕber em Waldeggli, wo hȕt de Raase gȁg d Sanischtrooss ȕberen ìscht, ùf d Chìnderleer gwaartet. Nȁbet em Schuelhuus hebs dȁnn no en Chridebȕchsbaum (Ùschteröpfel) ghaa, ùnd jetz ìm Noosùmmer, halbriiffi Öpfel am Bode. Do heb ȁine von Döörflerpùùrschte den Ùssewȁchtler de Voorschlaag gmacht, «demm, wo mìt emen Öpfel de Chopf vom Hȁiland trȁffi am Chìlefȁischter obe, wùùrd ëër en Zwȁifrȁnkler gùmpe loo fȕr de Hërbschtmäärt!». Druuf heb ȁine vom Bëërg aben en Öpfel ìd Hand gnoo, sei es Schtùck ìn Frìdhoof iegloffen ùnd heb grüert. Ì der Chìlen ìne hebs gschëërbelet ùnd de Pfarrer seig schtuucheblȁich woorde. Jonu! Vill hȁt mer jo dem Chnaab nȕd chöne mache! Aber sìd dem Taag hȁt ëër bì siine Ziitgnosse der Ȕbername ›Chridebȕchs‹ ȕberchoo. Verzelt hȁt mer’s vor vìllne Jooren ì der alte Rössliwììrtschtùbe de Rȁini Buume senior, Soon vom früenere Walder Sìgerscht ùs de Chroonewiis.
[ 26 ]