Ìn ere Sȁchsklasseschuel hȁts es ìmmer emool ggëë, das en jȕngere Schüeler, won echli uufmerksam gsii ìscht, sich hetti chöne zwoo bìs drei Klasse hööcher am Leeren ùnd Verschtoo bìtȁilige. Ase hȁn ich ì de vierte Klass aaschiined dërewȁȁg ìntȁnsiv bìm Chopfrȁchne vo de Sȁchstklȁssler ìm Schtìlle mìtgmacht, das das em Leerer nȕd entgangen ìscht. Wo dȁnn di ganz Klass ȁifach mìt em Ërgȁbnis dernȁbet ghaue hȁt, zȁiget de Leerer zmool ùf miich ùnd sȁit: »Hërmann, sȁg ene was es gìt!« Ùnd ich hȁn tùmmerwiis, wie’s dȁnn ùf em Hȁiwȁȁg uuschoo ìscht, s rȁcht Ërgȁbnis gwȕsst. Das hȁni dȁnn aber scho böös müese püessen ùnd hȁ mer dȁnn ȁigetli voorgnoo, nȕmen ase voorluut z sii, zùm nȕd der Argwoon von Elteren ì de Schuel ùf mich lȁnke.
Aber was wottscht, scho glii hȁts wìder Gglȁgehȁit ggëë, das de Paul Wȁlti di Groosse hȁt chöne zùm gschnȁller Tȁnken aaregen ùnd ȁben ȁine vo de jȕngeren ùm en Antwort frooge. De Toni Baggeschtooss, wo no es Joor jȕnger gsii ìscht, hȁt dȁnn aber bald no gschnȁller gschalten als iich, ùnd dem sìnd ùf em Schuelwȁȁg au di groosse Schüeler nȕd ȕberlȁge gsii. De sȁb ìscht ase flìngg gsii, das er’s au mìt em Wȁnger Frìtz ab der Ùndere Schȁidegg ooni wiiters uufgnoo hȁt.
Ich tȁnke hȕt no mȁngs Mool draa, wie liecht das es mìr gfalen ìscht, dùr d Mìttelschtuuffe vo de Prìmaarschuel z choo, wìll ich jo scho zwȁi, drüü Joor voruus ase nȁbetbii mìtgmacht hȁn bì mine Liebligsfȁcher Gschìcht, Geografii ùnd Chopfrȁchne. Asen ìsch es au ganz sȁlte voorchoo, das ich dihȁime hȁn müesen Uufgabe mache. Das hȁni ȁbe mȁischtens ì de Schuel ase ganz nȁbetbii scho chönen ërledige. Nù hȁni ìmmer Müe mìt de Schriibnote ghaa, wìll ȁigetli di lìngg Hand di gschìckter gsii wäär, aber doo hȁts jo ì sȁbere Ziit no kȁin Pardon ggëë. Mer hȁt jo au dihȁimen ìmmer druuf gglueget, das vo chlii uuf mìt de rȁchte ggȁssen ùnd zȁichnet woorden ìscht. Das hȁt mich dȁnn öppe scho rȁcht gwùnderet, ìscht doch min Vatter sȁlber en totaale Lìnggshȁnder gsii, hȁt aber au mìt de rȁchte Hand ggleert ghaa schriiben ùnd ìscht au sȁlber nie zfrìde gsii dermìt. Mììr ìsch es aber dȁnn zguet choo, won ich ìm Nüünevierzgi Ùnfall gmacht hȁn ùnd derbii vier Fìnger vo de lìngge Hand ganz oder tȁilwiis verloore ggange sìnd.
Lȁider sìnd aber hȕt eso Meerklasseschuele mee ùnd mee em Uusschtëërbe, ùnd wëërded mȁngen Orts d Schüeler mìt em Bus zȁmegfüert ùnd mìt de Döörfler ì Ȁiklasseschuelen ùnderrìchtet. Di nöie Schuelplȁȁn wëërded au ìmmer komplȁxer ùnd Früeȁnglisch ùnd Französisch ì de Primarschuel ìscht asen ìn ere Meerklasseschuel chuum me z bìweltige. Fȕr miich goot dermìt aber e Schuelform verloore, wo vor 100 Jooren au ìm Doorf no gang ùnd gääb gsii ìscht. Zwoor sìnds doo mȁischtens nùr zwoo Klasse gsii oder drei, aber mer hȁt sich doch müese de jȕngeren aapasse, ùnd was mìr ganz wìchtig schiint, au ggleert sȁlbschtȁndig schaffe.