Ich bìn ìn jùnge Joore zwȁi Mool z Tööss ì de Fërie gsii ùnd jewiile mìt de Tante Bërta sìcher zwee, wȁnn nȕd mee halbi Tȁȁg ì de Wùchen ìm Raadhoof ùsse gsii. Die ìscht ì der Ërnt ùnd öppen au sùscht bì ìrer Frȕndin Bërta Fehr-Chuenz go hȁlffen oder aber go Hȍrdöpfel ùnd Ȁier poschte. Die zwoo Fraue sìnd gliich alt gsii, ìm Fȁlmis ùnd Ghȁischt gwont ùnd ìm Hüebli mìtenand ìd Schuel ggange. Bȁid hȁnd jùng ghürooten ùnd sìnd mìt em Welo nù grad e halb Schtùnd vonenand gwont. D Bërta ìm Raadhoof ìscht e Gusiine vo miner Mueter, e Tochter vom Föörschter Albërt Chuenz ìm Fȁlmis ùnd de Schmìdsbërta, de Schwöschter vo de Grosmueter ìm Halpërg gsii.
Ase bìn ich au schpȍȍter ìmmer öppe mìt em Welo oder Moped ìm Raadhoof verbii choo, wȁnn’s mi en oograads Mool deet use verschlage hȁt. Das ìscht mȁischtens dȁnn de Fall gsii, wȁnn ich bì de Kërn & Schufelbërger z Brütten ùsse z tue ghaa hȁn.
Dȁnn sìnd aber d Gusiine vo de Mueter ali Joor emool zȁmechoo ùnd mer hȁt wìder vernoo, was an verschìdenen Orten öppe fȕr Hoochsig oder Tauffene gsii sìnd.
Ìm Raadhoof sìnd zwee Söön gsii wo puuret hȁnd, ùnd de Vetter hȁt ìmmer Uusschau ghaa, woo das öppen e rȁchts Hȁime fȕr sin Jȕngschte z haa wäär. Es hȁt si dȁnn ërgëë, das ìm Blȁsihoof en groosse Gwërb fȁil woorden ìscht. De Vetter Albërt heb en gchaufft, ùnd das bȁid Söön öppe di gliich Bìlaschtig ùf em Land ghaa hȁnd, jedem ȁine zùm e rȁchte Priis wiiters ggëë.
Der Otti hȁt ghürooten ùnd ìscht ùf sin Hoof z wone choo. Ìm eerschte Joor ìscht de Blȁsihoof no echli hìnenoowe ghùnke mìt em Aasääje, asen ìscht de Vetter mìt de Raadhoof Ross ȕbere cho hȁlffen achere. Won ëër dȁnn emool echli choge früe scho draa gsii ìscht, wìll er ȁifach nȕme hȁt chöne schlooffen ùnd tȁnkt hȁt, sini Ross traabed ì de Chüeli no lieber ùf de Hoger ue, hȁt er ùf em Blȁsihoof au no grad Tagwacht gmacht. Ër hȁt mìr dȁnn emool ìm Vertrouen ùnd lached verzelt, der Otti hebi obenabe ggrüefft: »Bìscht scho wìder doo, du chȁibe Jaghùnd!«