Ich cha mi no schwach bsìne, das es z Wald ùm d Chìlen ùme kȁis Trottwaar ghaa hȁt. D Frau vom Beck Volewȁider ìscht vìll mìt ere Handaarbet ùf em groosse Voorzȁien obe gsȁsse, wìll sii vo deet uus ìmmer d Ladetȕȕr hȁt chönen ȕberwache. Zȁme mìt der Chìlerenovazioon ìm 31i ìscht dȁnn aber das Voorzȁien öppe zwee Meter zrùgggnoo woorde, zùm de Hauptschtrooss mee Platz z mache. Ebesoo ìscht s öffetli Pissoir nȁbet de Schȁidegg abbroche ùnd d Schtrooss zwee Meeter verbrȁiteret woorde. S alt Sekschuelhuus, wo no vo de Chìle als Ùnderrìchtszìmmer fȕr Phöörmȁitli ùnd -bueben ùnd als Gmȁindssaal bbruucht woorden ìscht, won ìm obere Schtock au no de Sìgerscht Chȁgi gwont ìscht, hȁt dëre Schtroosseverbrȁiterig müese wiiche. D Sanischtrooss hȁt dȁnn bìs ìs Paanglȁis ue en Bsetzibìlaag ȕberchoo. Am mȁischte gfreut hȁnd aber öis Chìnd i dëre nöie Chìlenaalag d Goldfìsch ìm Päärkli nȁbet em Brùne mìt de Joorzaal 1932 ùf em Bode vom früenere Schuelhuus. No mȁischtens hȁt d Mueter no em Poschte mìt is gschwìnd müese deet verbii go luege. Ì der Chìle sȁlber hȁts au en Huuffe Verȁnderige ggëë. D Siitenempore sìnd ewȁgg choo, d Oorgelen ìscht ùf di öschtlich Siiten ȕbere gnoo woorde. Zùm derfȕȕr Platz mache, ìscht d Chìle ùf d Oschtsiten aabboue woorde. Di beede Poorchìle vo der alte Holzpalisade bìfreit. Defȕȕr hȁt mer dȁnn es glȁnzigs Iseglȁnder mache loo, won ì der Folg fascht niemertem gfale hȁt. Dȁnn ìscht aber au d Empoore bìm Voorzȁie weniger schtȁil gmacht woorde, das mer vo obe nù no grad di forderscht Bankrȁȁjen ìm Schìff gsee hȁt. D Oorgelenempoore hȁt dȁnn au en Uuszùùg ȕberchoo. Das es heller woorden ìscht ì der Chìlen ìne, sìnd di farbige Schiibe, mìt Uusnaam vo drüü Bìldere, ›Zwìngli ùnd Luther‹ ùf de Rösslisiiten ùnd ›Chrüzigùng‹ nȁbet de Chanzle gȁgem Zìpfel ȕbere, dùr en Aard rȁchteggig Mìlchglaasschiiben ersetzt woorde. Bìm Hauptiigang bìm Voorzȁie hȁt de Schtukkatöör ad Tìli vo der Poorchìlen e Handwȁberi modeliert. Als Sìnnbìld fȕr öiseri Gmȁind, wo sìd alters hëër vo de Tȁxtiilinduschtrii präägt woorden ìscht. Aafȁngli Huusìnduschtrii, schpȍȍter dȁnn ì de Fabrìke. Ìntressant au z wȕsse, das es do ùms Liseli Wettschtȁi ìm Rìckebach goot, wo a Schtell vo ìrer eltere Schwöschter Modȁll gschtanden ìscht.
Zùm emen alten belschtand abhȁlffe, sìnd di gchaufften Oort ì de Chìlen ewȁggchoo ùnd en ȁinhȁitligi Schtuelig gmacht, mìt ere Hȁizig, wo dë Namen au verdienet hȁt. Früener wääred d Puuren ùs den Ùssewachte nienet anderscht als ìm Brȁnzchȁller hìne ghocket. S ganz Schìff ìscht fȕr d Fraue reserwiert gsii, ùnd ùf de Poorchìle sìnd ìmmer au Mane gsii. [ 17 ] An Nachmoolstȁȁg hȁt mer au öppe s chlii Chöörli ùnder de Chanzle bsetzt, mȁischtens au Fraue. Deet ìsch mer aber oogern ghocket, scho wȁg de Halscheeri.
Es hȁt dȁnn allerhand Aaschtrȁngige bbruucht, bìs ìn Fȕfzger Joor di früender Sìtzoornig ȁntli verschwùnden ìscht. Nach ere Chìlegmȁindsversammlig, won die Nöierig aagregt woorden ìscht, hȁt mer als ȁinzige Maa de Frìdrich Elmer zmìtzt ìn Frauebȁnk ìm Schìff ùne gsee. Z hìnderscht ìm Brȁnzchȁller hȁts amel e groosses Bìld ghaa: ›Chrìschtus ìm Äärifȁld‹, wo dȁnn no vìllne Jooren eme Schprùch hat müese wiiche. ›Einer ist euer Meister, Christus / Ihr aber seid alle Brüder‹, schtoot hȕt no a dëre Wand, ìscht aber bì de Reschtaurierig ìn nöien Abschtellruum hìndere choo, wìll mer doo de Brȁnz ùm e paar Meeter verchȕȕrzt hȁt. Dë Schprùch ìscht vom Kurt Mühlbauer entworffen ùnd au uusgfüert woorde. Z vermȁlde wäär doo no, das em 1. Novȁmber 1947 grad drei ›Nöiji‹ ì öisere Chìlen aagfange hȁnd. De Pfarrer Walter Hueber, der Organìscht Hȁini Guhl ùnd de Sìgerscht Alfred Chùschter. Ìm 53i hȁt mer dȁnn müese s Zìferblatt vo de Tùrmuur ernöiere, ùnd mer hȁt bìm ›Chrüzköbel‹ vornen ì der Wììrtschaft verzelt, de Mooler heb si bìschwëërt wȁg dëre Büetz. Ìmmer wȁnn ëër wìder rìchtig am Schtrììche seig, schlög em de Minutezȁiger de Pìnsel ùs der Hand!
No bìmërkeswërt ìscht ìm Zȁmehang mìt de Chìle, das öisere schöön Taufschtȁi ùs grauem Marmoor vom doozmool jùnge Bìldhauer Jakob Hȁnseberger ìm Roosetaal ùssen als sii erschti öffetli Aarbet gschaffe woorden ìscht. No hȕt passt er eebigsguet i öisere Chìleruum ie, derbii schtoot er scho sìd em 1908i ìm Mìttelphunkt vo de schöne Walder Chìlen ùnd hȁt sìcher scho fȕr Tuusigi vo Tauffene ddienet.
[ 18 ]