Won ìm 1970i z Grüenige d Chìle abbrȁnnt ìscht, sìnd der Emil Wüescht ùnd der Alfred Chùschter, Sìgerschte vo Rüti ùnd Wald, em Tag no der Brouscht ùf Grüenigen abe gfaare. Sii hȁnd deet ìren Sìgerschtekoleeg, de Sattler Chȕndig troffe, zùm luege, seb mer dëre Chìlegmȁind ùf ìrged en Aard öppis chönnti hȁlffe. De Sattler Chȕndig ìscht dȁnn mìt ene zùm amtierede Sìgerscht ggange; dëë ìscht vom Schrȁcke no ganz bìnoo gsii. Die beeden ùs em obere Bìzìrkstȁil hȁnd dȁnn vernoo, das s ganz Oobigmoolgschììr, mìt Uusnaam vo de Bȁchere, wo bìm Sìgerscht dihȁime versoorget gsii sìnd, ìm Füür hiiggangen ìscht. Em Alfred Chùschter ìscht dȁnn d Idee choo, d Walder Chìle chönnti vo ìrne 12 Wiichane vier ùf Grüenigen abe brìnge. Pfarrhërren ùnd Chìlepresidȁnt sìnd iiverschtande gsii. Esoo ìscht der Emil Wüescht no di gliich Wùche mìt em Walder Sìgerscht Chùschter ùf Grüenige gfaare. Es ìscht jo en Nachmoolssùndig bìvoorgschtanden ùnd d Grüeniger hȁnd die Chane danked etgȁgegnoo. Bì der nȍȍchschte Chìlepflȁȁgssìtzig hebi mer dȁnn bschlosse, Grüenige die Chane z schȁnke. Wìll nȕme wie früener an Nachmoolssùndige d Chìle bìs ùf de letschti Platz, bìs hìnderen ìn ›Brȁnz‹ bsetzt seig, wëërdi mer au nie me all Wiichane bruuche.
Ìm wiitere bìschtoot scho sìd langem zwȕschet Grüenige ùnd Wald en ȁngi Verbìndig. Die ìscht zwoor ìn alte Ziite bìn Waldere nȕd gschetzt gsii, wìll d Groofschaft ùnd schpȍȍter s Oberamt Grüenigen e schtrȁngi Uufsìcht ȕber ali Gmȁinde rùndùme ghaa hȁt. Esoo sìnd bìm Nöibou vo öisere Chìlen ìm 1757i au d Wappe vom Oberamt Grüenige, vom Landvogt vo Grüenigen ùnd vo zwee Bȕȕrgermȁischter vo der Schtadt Zȕri als Oberbìhörden a der Walder Chìletecki vereebiget woorde.
Ì der Folg vom Grüeniger Chìlebrand hȁt dȁnn de Kantonaal-Sìgerschteverband de Pfarrer Schtockar z Wetzike, won sich ì siire Freiziit mìt den Oobigmoolsgschììr ìn Chìlegmȁinde bìfasst hȁt, zùme Vortraag iiglade. Es hȁt dȁnn ì der Folg en Invȁntarisierig von Oobigmoolsgrääten ì allne Gmȁinde ggëë. De Pfarrer Schtockar hȁt ali Chanen ùnd Bȁcher zùr Kontrolen ìs Landesmuseum z Zȕri bbroocht. ber das Invȁntar hȁt ëër es Buech verfasst: ›Abendmahlsgeräte ìm Kanton Zürich‹, wo ì allne Chìlegmȁinde tȕȕrfti vorhande sii. Die Chane, won dȁnnzùmool ùf Grüenige gschȁnkt woorde sìnd, trȁȁged d Inschrift: ›Kirchgemeinde Wald 1753‹. Das ìscht vier Joor vor em Bou vo der nöie Chìle. Derzueane ìscht ùf jeder Chane s Walderwappe mìt de drei Tane drùff. Es ìscht derzue no z sȁȁge, das die Schȁnkig au ùf en Aard e Versöönig mìt em alte Grüenigen ùnd es Symbool fȕr d Zȁmeghöörigkȁit vo de Chìle chönnti sii.
[ 16 ]