De Vatter hȁt amel verzelt:
Bìs ìd 20er Joor ie ìscht ìm Oberholz vo zwee Brüedere Pfȁnniger vo Hiwiil ȁnedùren e mëchaanischi Schìfflischtìckerei bìtrìbe woorde. D Fraue vo dene Schtìckfabrìkante sìnd ùs de Gȁged gsii. Em Theobald siini ìscht en Elise Chuenz ùs em Fȁlmis gsii. D Ida Pfȁnniger-Oberholzer, d Frau vom Theophil Pfȁnniger ìscht aber vom Oberholz sȁlber gschtammt. Miini Tante Bërta Schufelberger hȁt ìm Oberholz zȁme mìt em schpȍȍtere ›Waldquȁllbsìtzer Vonaarburg‹ ì der alte katholische Chìlen ùnen anere Schtìckmaschine gschaffet, schpȍȍter dȁnn au no mìt ere Näämaschine noowegschtìckt Es hȁt dȁnn ìm Oberholz ȁnen au e Rȁȁje Zuezȕgler ghaa, won aafȁngli ì de Schtìckerei e guets Uuschoo ghaa hȁnd. Famìlie Zangger, Chrauer ùnd Pfìschter sìnd mer no ìm Sìnn. Miin Vatter ìscht doozmool nȁbscht anderen als jùnge Pùùrscht ìs Oberholz go fȁdle. Die Aarbet hȁt dȁnn müese gmacht wëërde, wȁnn d Maschine gschtande sìnd, ùnd regelmäässig seiged derbii au ìmmer d Noodlen ùnd Schìffli kontroliert woorde. Zùm Aatrììb vo dene Maschine hȁts jo ìm Oberholz ekȁi Wasserchraft zùr Verfüegig ghaa; derfȕȕr ìscht aber ìm chliinen Aabou, am schpȍȍtere Schiihuus, en Diselmotoor gschtande. Em Verzele noowen e Wùndermaschine. De Vatter hȁt prìchtet: «Zùm Aaloo hȁts e Suurschtoffflȁsche bbruucht, ùnd nùr, wër mìt dene vìle Hȁȁndli ùnd Hebeli druuschoo ìscht, hȁt das ›Agregaat‹, wie s Pfȁnnigers ìmmer gsȁit hȁnd, zùm rùnde Lauffe bbroocht!»
Nodemm dȁnn z Wald ùne de Tokter Kuehn ùnd de Zoller vom EW sich es Auto aagschafft hȁnd, seigs em Theophil Pfȁnniger ìn Chopf gschtìge, ùnd ëër heb au eso en Schtìnkchare müese haa. Schiints hȁt ëër aber ekȁi gueti Gschpüüri ghaa fȕr das Autööli z schtüüren ùnd sei ùf siiner eerschte Faart ìs Oberholz, ì ›s Wȕȕrze Hȁiris’ ì der Oo nȁȁbetuse ggroote. Doo hett em Tokter Kuehn siin Schofföör sele cho zùm Drȁck uus hȁlffe. Aber au dëë hejg’s nù fërtigbbroocht, das si d Reder no tüüffer iiggrabe hȁnd. Druuf heb dȁnn de ›Wȕȕrze Hȁinrich‹ es schwëërs Rìnd iigschpanen ùnd vornen a der Schtoossschtangen aaghȁnkt. Aber ìmmer no heb das Autööli kȁn Wank too. Wo de Schȁidegger de Motoor aaloot zùm Noowehȁlffe – «Potz Blìtz!» Jetzt heb si aber öppis bìwegt! Das ›Rìndvee‹ ìscht verschrocken ùnd noch e paar Gȕmp seiged Zùgtier ùnd Auto ùf der Gȁgesiten ìm Bȁchli glandet.
Nȕd lang no dem Autochauff, oder vìlìcht grad detwȁge, ìsch es ìm Oberholz nȕme gloffen ì der Schtìckerei, ùnd mer hȁt der Aafang vo de Schtìckereikriise z gschpüüren ȕberchoo. Drùnder ùnd drȕber seigs ìm Oberholz ggange; was vor eme Joor no esoo guet uusgsee heb, sei ìmmer bööser woorde. De Theophil hȁt sich dȁnn hȁimli ìs Ùssland abgsetzt, [ 14 ] ùnd siin Brüeder Theobald, scho lang en chranke Maa, ìscht glii druuf gschtoorbe.
De Baldi junioor heb dȁnn probiert, mìt em Chnȁcht Buume de Bìtrììb no z rette; au ëër ìscht doo scho en chranke Maa gsii ùnd hȁt nȕd d Chraft ghaa, die schlȁchte Joor z ȕberschtoo. Esoo ìsch es dȁnn choo, das beedi Hȁime verchauft ùnd d Schtìckmaschine als Altise verhöckeret woorde sìnd. Mìr hȁnd ìm Ghȁischt bìs vor wenig Joore no Biilichȁschte ghaa, wo s Pfȁnnigers Chnȁcht ì der Schtìckerei ȁne suuber ùnd mùschtergȕltig gschriineret hȁt. Di ȁigetli Schtìckerei ìscht vom Walder Schiiklùp gchaufft ùnd ìn e Schiihȕtten ùmfùnkzioniert woorde.
Ùm Mìtti Driissger Joor sìnd doo vo de Hìtlerjuged öppe zwȁi Laager dùregfüert woorde. Mìt em Horscht als Lȁiter hȁnd die Pùùrschten ìm Ghȁischt am groosse Schliifschtȁi ìri Dölch gschlìffe. Wääret em Zwȁite Wȁltchrieg sìnd dȁnn au öppen ìnternierti Poolen ùnd Franzoosen iiquartiert gsii.
Vo s Theobald Pfȁnnigers hȁnd no em Tood vom Baldi no vier Söön glȁbt. Der Otti ìscht Mëchaaniker gsii, hȁt aber ì der Kriiseziit ìm Hìttebërg wonhaft als Hìlfsaarbȁiter ùf em Bou gschaffet; schpȍȍter dȁnn ìsch ëër fùrtzoge ùnd ìscht z Öörlike ìd Maschinefabrìk ggange. De Walter, echli zwërgwüchsig, ìscht ìm Bȕȕrgerasiil alt woorde, ùnd di zwee jȕngschte hȁni mìt der Ziit ganz ùs den Auge verloore. D Schtìckerei hȁt ì öisere Gȁged ȁinewȁȁg nȕd mȁngs Joor floriert; gliichwoll sìnd no an es paar Oorte Gìbäu ùme, won vù dem Tȁxtiilveredligsgwëërb hëër schtamed.
[ 15 ]