Ìn zwȁnzger Joore hȁt de Schrȁpfer Köbel ìm Hìndererli s Hȁimen ùnd d Saagerei vom Brȁndli gchauft. Ëër ìscht zwoor kȁin Saager gsii, aber en Nȁbetverdienscht ìscht jo ìmmer guet gsii. Esoo hȁt er sich dȁnn au ùf dem Metiee probiert. Die Saagi ìscht aber doo scho rȁcht alt ùnd nȕme hùndert Prozȁnt ìm Schtand, das es rȁcht Erfaarig bbruucht hȁt, das ales graad gloffen ìscht. Ase sìnd halt nȕd ìmmer ali Brȁtter graad gschnìtten usecho. Esoo hȁt dȁnn de Schrȁpfer emool es Ìnseraat ìm ›Volksblatt vom Bachtel‹ ghaa. «Zu verkaufen einige Bloch Bretter alle Dicken!» Dëë wo’s dȁnn vome Fuerme hȁt lo hole, hett em Saager no bald en Prozȁss aaghȁnkt, aber dȁnn iigsee, das ëër jo nȕd ȁigetli bschìsse woorden ìscht. Zwoor scho echli ȕbers Oor ghaue, es wäär aber scho si ȁigni Sach gsii, das Holz gnäuer aazluege, hȁts doch tüütli ìm Ìnseraat ghȁisse: «Alle Dicken»! Nù nȕd grad am gliiche Brȁtt. Sȁb ìscht fȕrs wiiters bruuche nȕd grad ideaal, bsùnderhȁitli wȁnn’s öppis Gnaus setti gëë dervoo. Die zwee hejged sich dȁnn zùmen Iivernëë gfùnden ùnd ooni Frìdesrìchter dë Handel bìrȁiniget. Miin Vatter hȁt dȁnn aber mìt e paar Esche saage Loo Glȕck ghaa. Scho ìm eerschte Schnìtt ìscht e Gweerchùgle fȕrechoo ùnd hȁt s ganz Blatt verheit. Druuf heb de Schrȁpfer, öisen Noochber ìm Geer, lo choo, zùm dë Schade bìheben ùnd d Saage nöi rìchte. Dëë Ërni ìscht en alte Saager gsii ùnd hȁt nȕd nù s Saageblatt ùnd de Voorschuub nöi grìchtet, nȁi au de ganz Wagen ùnd s Drùmm ùnd Draa ìscht gnau iigrìchtet woorde. Zùm s Ganzi dùremùschtere hȁt dȁnn de Vatter Ërni grad di aagfoone Schtȁmm gsagt. De Ghȁischtler hȁt dȁnn müese 20 Franke fȕr de Schade zaale, defȕȕr aber beschtens gsagti Escheploch chöne hȁihole, wo no mȁngs Joor fȕr Gable-‚ Schuflen- ùnd anderi Schtììl, aber au fȕr Schömel ùnd Bȁnk ì Huus ùnd Biilihüüser hȁnd chöne diene. Scho mȁngs Joor schtoot jetz d Erlisaagi schtìll. Doch ìmmer wìder, wȁnn i emool draa verbii chùme, gönd mer eso alti Erìnnerige dùr de Chopf. Au mȁngi scho fascht vergȁsse Bìgȁgnig oder Bìgȁbehȁit wììrt wìder wach.
[ 51 ]