Bìs mer ì der Walderschuel ȁigetlichi Sporttȁȁg veraaschtaltet hȁt, ìscht jedes zwȁit Joor ìm Wȁchsel mìt eme Schüelerkonzert en Tùrntaag, gnȁnnt ›Tùrnȁxame‹, dùregfüert woorde. Bì mììr ìn Erìnnerig bblìbe, wȁg e paar Blooteren an Füesse. Nȕd wȁg em wiite Marsch; nȁi wȁg eme Füür, wo mer gmacht hȁnd, zùm der Abfall vo dem Fȁscht ìm Lauf ùsse verbrȁne. Öiser paar Buebe sìnd dȁnn ìm Ȕbermuet ȕber d Flamen ȕbereggùmpet, ùnd ich bì gschlìpft, demìt zmìtzt drìniegschprùnge. Esoo hȁts dȁnn halt Blootere ggëë, won ȁ no rȁcht schmëërzhaft gsii sìnd.
Die Tùrnȁxame sìnd ìm Wȁchsel vo de sìbe Walder Schuelwachten organisiert woorde. Esoo hȁts dë Aaloss ggëë ùf em Lauf, ì de Schtiigwȁid, ùf em obere Höömel, ì de Tanneregg, ìm Riet hìne, ùnd glaub emool ùf der Gart ùnd ìm obere Moorgen ùsse. Zùm Zȁiche vo der Abhaltig ìscht ìm Bìnzholz de grooss Faanen useghȁnkt woorde, ùnd d Ùssewȁchtler hȁnd sich ì ìrem Schuelhuus de Bschȁid müese hole. Esoo ìsch mer dȁnn ìme Stëërnmarsch em früene Nomittag ùf de Fȁschtplatz zue gloffe. Deet hȁnd dȁnn d Schüeler, zeerscht ì Gruppe, ùnd as Hööiphùnkt ali gmȁinsaam, s Tùrnprogramm ùnder Lȁitig vome jùnge Leerer tùrnet. Es sìnd aber au Schpììler gmacht ùnd bsùnderbaar von Mȁitli Rȁigen uufgfüert woorde. Au s Sìngen ìsch nȕd z chùùrz choo! Dë Gsamtchoor ìscht ȁimol vom Hȁiri Hotz ùnd au emool vom Gottfrìd Chȁller ddìrigiert woorde. Es hȁt au ìmmer Zueschauer ghaa, wo bsùnderhȁitli am gmȁinsaame Sìnge von Walderschüelere di helli Freud ghaa hȁnd. Jedes Chìnd hȁt zùm Abschlùss Wùrscht, Broot ùnd Süessmoscht ȕberchoo. I mag mi bsìne, das es Rossfuerwërch de Moscht ìn groosse Schtandflȁschen ìnen ìn Lauf ue bbroocht hȁt. Dȁnn ìscht aber ìmmer s ›Wùùrschtchlȁderen‹ e bsùnderi Attrakzioon vo dem Fȁscht gsii. Es sìnd zwoor mȁischtens nù di wiffschten ùnd frȁchschte Buebe zùm Zùùg choo. An ere ghoblete, öppe sìbe Meter hööche Schtang ìscht ame Trootrìng dë Wùùrschtsȁȁge mìt eme tȕnne Sȁili ufezoge woorde. Weer si dobe hȁt chöne heben ùnd au no e Hand frei mache zùm sich e Wùùrscht abzeere, hȁt Glȕck ghaa ùnd ìscht esoo zùmen ȁxtra Happe choo, wo d Juged ì sȁbne Joore jo nȕd verwönt woorden ìscht demìt. No em Ȁnd vom Fȁscht ìscht jee no Leerer ȁinzel oder ìm Klasseverband de Hȁiwȁȁg aatrȁte woorde, ùnd esoo ìscht en fröölige Taag, wo mer scho lang druuf planget hȁt, z Ȁnd ggange.
[ 23 ]