De Götti vo miner Mueter ùnd au de Grosmueter ìscht ìm Chrattehoof ì de Hueb dehȁime gsii, ùnd ich bìn ìmmer gërn deet z Bsuech ggange. I bsìnn mi, wie mer emool ùm Mìtti Driissger Joor ùf Wërnetshuuse dùre zù miim Götti ggange sìnd. Wìll d Hueb aber grad em Wȁȁg ȕber Halpergholz, Joonetaal, Hueb, Sȁnebëërg, Hìnderbachtel glȁgen ìscht, hȁt d Mueter es Pfȕndli Biilihùng iiphackt ùnd ùf em Wȁȁg em Götti Schaagg ùnd der Elisen ìd Hueb ȕbere bbroocht. Das grooss Zȕriseehuus hȁt mìr scho ìn Buebejoore mȁngs Räätsel uufggëë. Bbouen ìscht das Rìgelhuus zìmli sìcher vome Hüüsser woorde, wo vom See ùnenue gschtammt hȁt. Em 16. Jȁnner 1834 hȁt de Jakob Chuenz-Egli vo der Eerbegmȁinschaft Hüüsser das Huus mìt eme Hȁime dezue chöne fȕr 10250 Franke chauffe. Am Chrattehoof hȁt mi ìmmer di alt Uur a de Gìbelwand bsùnderbaar ìntressiert, öppis sìcher fascht ȁimoolis ame Puurehuus. Jȁ halt, die Chuenze sìnd jo ȁ nȕd nù Puure gsii. Hauptsȁchli de Robert ìm vordere Huustȁil ìscht en tȕchtige Schmììd gsii ùnd di groosse Toor-Bhȁnk vo öisere Schüür, aber au d Brùggewagebschlääg hȁnd siis Zȁichen iigschlage ghaa, ›RK‹. Dȁnn hȁts ìm Huusgang ìne, deet wo mer dùr de Chȁllerhals aab hȁt chöne, en lȁbesgroosse ›Bourbakisoldaat‹ gmoolet ghaa, ich ha mi zwoor schier gfȕȕrcht devoor. De Schmìtts Schaagg hȁt en groosse, wiisse Paart trȁit, ùnd si Frau ìscht gaar nȕme guet z Fuess gsii. Ich cha mer dë Vetter nȕd andersch voorschtele als ìme bruune Halbliine-Gwand mìt ere Westen ùnd ere brȁiten Uurechette draa. Di zwee Chrattehoofbrüedere sìnd ȁigetli zwoo rȁcht ùnderschìdlichi Persöönlikȁite gsii, de Schaagg eener grooss ùnd bhȁbig, de Robert en prìngen aber en trȍȍtige, ìmmer fȕr allerhand Gschpȁss uufglȁit. Beed Frauen ìm Chrattehoof sìnd vom Töösstal choo. Em Schaagg siini ìscht e Wylemaa gsii. D Mueter vo siiren ȁinzige Tochter ìscht e Mȕller ùs em Tȁndler gsii ùnd ìscht früe gschtoorbe. Em Robert si Frau ìscht e Trachsler gsii ùnd hȁt langi Joor böösi Bȁi ghaa. Schiinbar hȁt si aber gliich ìmmer gwȕsst, was ùf de Wìsen ùsse gloffen ìscht, de Vetter hȁt emool ìm Gschpass gsȁit, si chönn mìt em Ooperegugger sogaar ùm d Eggen ùme luege. Em Schmìtts Schaagg sin Noofolger ùf em Hȁimen ìm Chrattehoof ìscht em Robert siin eltschte Soon woorde, wo ȁine von wenige Traktooren ì de Gmȁind ghaa hȁt. Bì der Aabouschlacht ìm Zwȁite Wȁltchrieg hȁt er dȁnn au vìll Aarbet ghaa mìt z Acher Faare. [ 10 ] Mi Grosmueter ìm Halperg ùnen ìscht di jȕngscht Schwöschter vo de Chrattehoof Schmìden ùnd Puure gsii ùnd hȁt no vìll vo ìrer Juged ùnd de Hueb verzelt. Ùnder anderem, wie ùm Mìtti letschts Joorhùndert bì ìrem Grosvatter, aagȁndi Fabrìkante bìm ›Chrattehoof Schmììd‹ s schwarz Gwand vertleenet hȁnd fȕr ad Börse z goo. D Ziiten ȁndered ùnd d Lüüt au, aber d Erìnnerig a alti Bìgȁbehȁite sìnd lȁider, wȁnn’s nȕd näumen uufgschrìbe sìnd, bald emool vergȁsse.
[ 11 ]