De Brüeder vo mim Uurgrosvatter ìm Hüebli hȁt hìnder em Schuelhuus gȁgem Erli a de Schtrooss zue e Wììrtschaft mìt eme Laden ìm Chȁller ùne bìtrìbe. Dezue hȁt aber au e teckti Gaartewììrtschaft ghöört, won sìcher ame Sùndig vo den Uusflȕgler fliissig gnùtzt woorden ìscht. Öppen ùms 1910i ùmen ìscht dȁnn die Wììrtschaft samt em zueghöörige Hȁimen am ene Karl Hofme, Sȁnn vo Chlii Andelfinge, verchauft woorde.
Ich hȁn ì jùnge Jooren ìmmer ghöört verzele vom Soon vo de Brȁndli deert vorne, wo z Zȕri ìne wȁiss iich was fȕr e gueti Schtell heig, ùnd verschìdeni Walder hȁnd au s Gfüül ghaa, ër gäb emool en Eerbvetter, wo früender oder schpȍȍter emool öppis z hole seig.
Es ìscht dȁnn zwoor nȕd ganz asen usechoo! ìm Teschtemȁnt wo no siim Tood ì gȁge 20 verschìdeni Hüüser z Wald gschìckt woorden ìscht hȁt mer nȁmli chöne lȁse: »Da ich keine direkten Nachkommen habe, vermache ich meiner früheren Haushälterin und derzeitigen Ehefrau«! Derzue sìnd e paar Verȁin ùnd Organisazioone mìt chliinere Sùmme bìdacht woorde. Ich wȁiss das no eso gnau, wìll au mini Mueter ìm drìtten oder vierte Graad no verwandt gsii ìscht.
Vo dene Brȁndli ì de Wììrtschaft hȁnd di alte Hüebler amel verzelt, die seiged chȁibe ghebig gsii. Aber vo nüüt chùnnt nüüt, ùnd ase mues mer ȁifach ales zȁmehebe zùm zù öppis choo.
De Karl Hofme hȁt dȁnn nȁbet em Puuren ùnd Wììrten au no als Puuremetzger gwȕrkt, ùnd bìn öis wääret ùnd grad no em Zwȁite Wȁltchrieg no mȁngs Söili gmetzget. Ër hȁt zwoor ganz gueti Bluetwȕȕrscht gmacht, aber di wiiteri Verwërtig vo somene Söili em Puur sȁlber ȕberloo. Asen ìscht halt ȁifach gsalzen ùnd ggräucht woorde, ùnd Gottlett hȁts bì chaltem Wȁtter di eerschte 14 Taag bìs drei Wùche ggëë.
Ich ërìnnere mich aber do draa, das scho bìm alte Tùrnplatz s Hofmes uusggrüefft hȁnd, wȁnn e Balen ìd Wìse nȁbet em Schuelhuus gflogen ìscht. Das ìscht dȁnn nach em Bou vom nöie Tùrnplatz gȁge de Hìrschacher abe no schlìmmer woorde. Mìr Schüeler hȁnd is mȁngs Mool gfrööget, wëër au e so vìll Ziit hebi zùm sim Graas Soorg hebe. Oder wehe, wȁmmer nȁbet em Doorfbrùnen as Pöörtli ane ghocket ìscht, no glii hȁts hìnefȕre töönt: »Goofe zùm Graas uus!« Ich hȁ dȁnn schpȍȍter gmërkt, das au s Pöörtli rùndùme no zùm Brùneland ghöört hetti.
Zù s Hofmes Ziite sìnd ìm Schtȕbli obe de Wììrtschaft au no öppe Versammlige vo Obschtbouverȁin ùnd Schȕtze mìt bìs 40 Persone gsii. Doo derbii ìsch es dȁnn aber scho chogen ȁng woorde. Verùssen ìscht d Gaartewììrtschaft aber vo s Hofmes chuum me zùm Wììrte bbruucht woorde, nȁi deet hȁt mer bì Rȁgewȁtter ìmmer Wösch uufghȁnkt, ùnd en Tȁil ìscht au als Schopf bbruucht woorde.
Noofolger vo s Hofmes ìscht dȁnn de Schnyder Melchior mìt sinere zwȁite Frau woorde. Dë hȁnd dȁnn d Hüebli Goofe rìchtig gërn ghaa, ër hȁt ene nȁmli gsȁit, ales was ùnder em Baum lìggi tȍȍrffi zȁmegnoo ùnd ggȁsse wëërde. Ùnd wȁg eme z wiit gflogene Böle hȁts scho gaar kȁin Lärme me ggëë.
Ì de vergangene Joore nach em Tood vom ›Melch‹ hȁt sin Soon das Huus ìnnen ùnd ùsse renoviert, ùnd es ìscht au di alti Gaartewììrtschaft ërnöieret woorden ùnd macht ales zȁme wìder en iiladedi Gattig, wȁnn doo scho nȕme gwììrtet wììrt.
Ich aber hȁn scho ì de Vergangehȁit mìr öppe Gìdanke gmacht, wie’s ìm Hüebli ȁchter ggrȁndiert hȁt, zwoo Wììrtschaften ùnd drei Lȁde z bìtriibe. Es hȁt doch nȁbscht de Beckerei, wo bìs ìm 1922i au Lade vo de Landwìrtschaftliche Konsuumgnosseschaft mìt Wërchzüüg, Petrool, Koloniaalwaaren ùnd Broot gsii ìscht, no ì beedne Wììrtschaften es Lȁdeli ggëë. Derzue anen aber hȁts au no de Wùle & Mercerie-Lade vo s Oberholzer Schaagge, ab de Zwȁnzgerjoore vo de Schwöschtere vo mim Grosvatter ìm Halperg, der Ida ùnd de Babette Brȁndli, ggëë.
Ì de Sȁnnhȕtten ìscht aber nȁbet Wììrtschaft ùnd Laden au no e Mìlchhȕtte gsii, wo früender au gchääset, schpȍȍter dȁnn no zȁntrifuuget ùnd de Nidel ùf Wìnterthur em Mìlchverband gschìckt woorden ischt.