Ìn Driissger Joore hȁt de Guschti Hessel vom Basaar, voormools J. v. Ferert, nȁbet em Schwërt, mìt eme sȁlber bboune Sȁgler vo de Schȁidegg uus aafoo flüüge. Gschtartet ìscht em Pȕggel ùsse woorde, Rìchtig Oberholz - Hìttebërg. Fȕr öis Buebe vo der Ùmgȁbig ìscht das notüürli öppis ›Tschännts‹ gsii, wo mer umbìdìngt hȁt müese go luege.
Wie mer em Hessel si Flùgi doo ue bbrocht hȁt, chönnti nȕme gnau sȁge. Aber wie mer si doo zȁmegsetzt hȁt, wȁissi no beschtens. Sìnd doch ìmmer e paar Buebe dernȁbet gschtanden ùnd hȁnd gschpanniflet, joo nüüt z verpasse. De Rùmpf mìt em Siiteschtüür ìscht ȁinewȁȁg a ȁim Schtùck dooufe choo. D Flȕgel hȁnd dȁnn ȁinzeln müese an Rùmpf feschtgmacht wëërde. Dezue sìnd zeerscht d Kaabel vo de Hööeschtüürig dùr di jewiilige Lȍcher gschoppet woorde, das mer no em Verschruube von Flȕglen ìm Rùmpf ìne hȁt chöne an Pedaalen ùnd an Schtüürchnȕppel iihȁnke. En Schtrȁiffe Schtoff, won an ere Schtangen uufghȁnkt d Wìndrìchtig aazȁiget hȁt, ìscht dȁnn fȕr d Schtartrìchtig z bìschtìmen ȕber lengeri Ziit bìobachtet woorde. Dȁnn hȁt mer en Isepfool iigschlage, won d Flùgi draa mìt eme Trootsȁili a de Schtartklìnke feschtgmacht woorden ìscht. S lang Gùmisȁil, won ì de Mìtti en Iserìng zùm Iihȁnken am Sȁgler ghaa hȁt, ìscht uusglȁit woorde. Öppen ìm Winkel vo 60 Grad, ì der Abflùùgrìchtig ùf bȁid Siite vertȁilt. D Lüüt zùm nochane s Sȁil aaschpane sìnd zùm Tȁil ùs de Zueschauer gholt woorde. Dȁnn ìscht de grooss Momȁnt choo, won de Guschti Hessel, mìt ere Flüügerchappen ùnd Brȕlen ì siini Kabiine gschtìgen ìscht ùnd ali Hebel ùnd Pedaal dùrekontroliert hȁt. S Schwanzschtüür hȁt hin ùnd heer ùnd d Hööeschtüür ue ùnd abe gmacht. Dȁnn hȁt de Schtartlȁiter, mìt Uusnaam vo de Zùgmannschaft, d Zueschauer hìnder oder wiit nȁbet de Flùgi uufgschtelt. Druuf hȁts ghȁisse «Sȁil uufnëë – ali hìnders Sȁil schtoo!» Öpper hȁt a de Flȕgelschpìtze d Flùgi woogrȁcht ghebet. Dȁnn ìscht wìder de Lùft bìobachtet woorde, das de Sȁgler joo nȕd ìn Abwìnd iegrooti. Wȁnn ales gschtìmmt hȁt, ìscht s Kommando choo: «Aazie!» D Zùgmannschaft ìscht vorwärts s Poort aab gschtȕrmt. De Guschti Hessel hȁt nomool mìt de Hand gwùnken ùnd siini Flùgi hìnen uusklinkt ùnd sich ìn Oberlȁnderhìmmel use schpìcke loo. Siin Sȁgler hȁt aber nonig di guete Flùùgȁigeschafte von hȕtige Sȁgelflùgene ghaa. Aber fȕr en Flùùg ȕbers Walder Doorf usen ùnd ìm Schportplatz ùsse go lande hȁts alewiil glanget.
S Hessels Flùùgaktivitääte hȁnd dȁnn zmool uufghȍrt, wìll ëër emool bìm Landiaaflùùg ìm Hìndernord ùsse mìt de Schtroomlȁitig kolidiert ìscht ùnd e [ 54 ] Brùchlandig gmacht hȁt. Mer hȁt dȁnn vernoo, es seig no glìmpfli abgloffe. E Hìrnerschȕtterig ùnd sùscht verschìdni Blessuure seiged bald wìder kuriert. Wȁg em Uusbrùch vom Chrieg hȁnd dȁnn d Sȁgelflüüger ìres Hobby müesen uufgëë, no Ȁndi Fȕfzgerjoor ìscht de Rùmpf vo s Hessels ›Sȁlbschtbouflùgi‹ ì der Joonetaaler Garaasch ghanget. D Aarbȁiter vo der Ornaprȁss hȁnd ìmmer öppe dë prìmitiivi Flùùgapperaat gschauet (aber gfloge ìscht er nȕd gsii!).
Öppe 1960
[ 55 ]