Hans Thommann-Radic
De Tokter Tomme hȁt bìn öis oben emool gsee, das mìr Haselmüüs gfange hȁnd, won is all Hërbscht hìnder d Pfluumen ùnd Zwȁtschgen a de Schüürwand ggange sìnd. Em Vatter hȁt er der Uuftrag ggëë, fȕr ìnn, zùm Schtudiere vom Wìnterschloof, ȁini lȁbig ad Asylschtrooss abezbrìnge. Ich hȁn scho am näächschte Taag ȁinen ì der Falle ghaa ùnd das Tierli prompt a der Asylschtrooss abgglìferet.
Deeten ìscht dȁnn dë uusgwachse, fascht sìlberfarbig Bìlch ìme groosse Chefi iigschpeert woorden ùnd hȁt sich de Wìnterschpȁck ganz ooni Schade z mache chönen aafrȁsse. Ìm Novȁmber ìne hȁt sich dë Kȁrli dȁnn ì sis Nȁscht zrùggzogen ùnd aafää schlooffe. Jetzt hȁt de Tokter regelmäässig Puls ùnd Tȁmperatur gmȁssen ùnd dervoo es Tagibuech gschrìbe. Wìll de Bìlch ȕberhaupt kȁis Aazȁiche vo Vertwache zȁiget hȁt, ìsch au öppe s Chefi nȕd vermacht woorde, was dȁnn emool zùm Verhȁngnis woorden ìscht: Gȁgem Nöijoor zue ìsch emool es Ziitli mìlds Wȁtter woorde. Ase hȁt de Veetokter, won er vo siine vierbȁinige Paziȁnte hȁichoo ìscht, es bööses Hagelwȁtter müesen ȕber sich ërgoo loo. Was ìscht gschee gsii? De Bìlch ìscht vertwachet, hȁt sich chöne nȁbetaa ìd Voorroots-Chammere vo s Veetokters inezwȁngen ùnd hȁt doo e gruusigi Bschëërig hìnderloo. Chääs, Frȕcht ùnd Hùnggleser, aber au Tȁigwaare, Riis ùnd Zùcker sìnd hȁigsuecht woorde, di loose Sache rùndùme verschtreut ùnd vor alem ales versouet ùnd oobruchbaar mìtenand vermìscht. Vom Sìbeschlööfer aber zeerscht ekȁi Schpuur! Mìt em vollne Buch hȁts schiints nȕme gglanget retuur z schlüüffe. Ase hȁt mer en dȁnn ìmen aagfrȁssne Chȕssi gfùnde, won ëër der ùnderbroche Wìnterschloof frìdli ì de Wùlen ìne wiitersgmacht hȁt. De Tokter hȁt en dȁnn ì sis Chefi verbannt, ùnd won er ìm Früelig vertwachet ìscht, ùf de Tuur ìm Goldige hìne näume gùmpe loo.
Em Veetokter Tomme si Frau ìsch vo Jugoslaavie choo ùnd ìscht d Schwöschter vome Diplomat gsii. Wìll de Brüeder bìmen Attentat ùms Lȁbe choo ìscht, seig d Frau Thommann ȁini vo de wenige gsii won z Wald en Waffeschii bsȁsse hȁt, ùnd dë Revolver ìscht au scharf ggladen ìm Nachttìschli versoorget woorde.