Asen ìscht sìcher ì de hȕtige Ziit nȕmen a mȁngem Huus aagschrìbe. Vor 60 Jooren aber bìn öis no gang und gȁȁb gsii. ›Drogerie & Kolonialwaren zum Schneeberg‹ ìscht sìcher dëë wo am beschte bìkannt ùnd am mȁischte bsuecht gsii ìscht. Dȁnn hȁts aber deet wo hȕt d Walder Apiteegg ìscht de Koloniaalwaarelade vom Hofme-Tamp ghaa, ich cha nȕd emool me sȁge, wȁge waas mini Mueter doo amel Schpeziells ìscht go poschte, aber aaschiined hȁt mer doo öppis ȕberchoo, wo de Schneebërg vom Kasser nȕd ghaa hȁt. Item, mer ìscht aber chuum ȁimool ìm Joor doane ggange. Ìm Tobel ùnen ìscht vor fȕfzg Joor no de Koloniaalwaarelade vo de Wìtwe Strehler Quartierlade gsii, ùnd ìm Hìndernord dëë vom Ȁichme-Schpȁcker, won en Ablaag vom Auguscht Leeme, Metzgerei z Laupe, ghaa hȁt. De Benazzi a de Gloriaschtross, schpȍȍter dȁnn Blöchliger, ùnd nochane Paul Schärer, ìsch mer vo Benazzis Zite hëër ìm Sìnn, wìll’s deet amig ganz exootisch gschmöckt hȁt, ich chönnt aber nȕme sȁȁge, ìscht das vome Gwȕȕrz oder sùscht vo öppis Ȁxtraanigem hëërchoo. Au d Frau Bȕrgisser ìm Hìnderdorf hȁt nȁbscht de Beckerwaar no Koloniaalwaaren ìm Sortimȁnt ghaa. Am Schmìttebach zue ìscht dȁnn en wiitere Lade mìt Gmües ùnd Koloniaalwaare vom Karl Erne ùnd siiner Frau bìtrìbe woorde mìt aaschiined vìle Chùnde, wo wie’s mìr no ìm Sìnn ìscht, mìt em Büechli sìnd go poschte. Koloniaalwaare hȁts aber au ghaa bìm Fischer-Wyss a de Schlìpfstrooss, do chan ich mi aber nȕd bsìne, dë Laden au nùr ȁimool vo ìnne gsee z haa. ›Bäckerei & Kolonialwaren‹ ìscht aber au de Lade vom Hüeblibeck aagschrìbe gsii, hȁt aber Fiigen ùnd Dattle nù grad ì der Advȁntsziit fȁilghaa.
Sìcher ì all dene Lȁde sìnd Tȁigwaare, Mȁis, Zùcker ùnd vìll anders offen ùs de Schublade verchauft woorde. Abphackts ìscht an mȁischten Oorten eerscht no em zwȁite Wȁltchrieg ì d Regaal choo. Ùnd hȕt gìts jo weder Hörndli- no Seupfechìschte, ales chùnt abpackt ùf em Palett ùnd mìt Kùnschtofffoolie gschrùmpft ìn Handel. De Kafi aber ìscht als Boone verchauft woorde, ùnd jede hȁt dihȁimen e Kafimȕli ghaa ùnd all Tag frìsch gmaale bbruucht devoo. Salz ìscht öppis Schpeziells gsii, ùnd das hȁt mer nùr bì dene Lȁden ȕberchoo won e Salzwoog, das hȁisst, s Rȁcht vom Schwizerische Salzregaal zùm Verchauff vo dem wìchtige Schtoff ghaa hȁt. Ich wùùrdi glaube, das das mȁischtens zȁme mìt ere Beckerei gsii ìscht.
Wȁnn ich hȕt dùrs Doorf lauffe, chùnnt mer öppe no z Sìnn, was fȕr Lȁde das es doo früener ghaa hȁt. Zù de vìllne prìvaate Lȁde sìnd aber dȁnn scho e ganzi Rȁȁje dërig choo, won em Konsuumverȁin Wald ghöört hȁnd. Ase notüürli de Konsuumhoof, won au d Verwaltig ìre Sìtz ghaa hȁt, ùnd ȁigetli s Laagerhuus vom Verȁin gsii ìscht. Dȁnn sìnd Lȁbesmìttellȁden ì de Brȁitematt, am Doorfplatz ùnd ìm Zȁntraalhoof ùsse (Hìndernoord), aber au ì den Ùssewachte Laupe, Diezike, Gȕntschbërg, Joonetaal ùnd Hueb vorhande gsii. Em Doorfplatz hȁts aber en groosse Mërcerii- und Wùlelade, ùnd bìm Rochat hìnen en guet bsuechte Schuelade ggëë. Ìm Doorfplatzladen ìscht aber ìm letschte Chrieg au d Ȁiersammelschtell gsii, wo Puuren ùnd anderi Hüenerbsìtzer d Ȁier vo den ȕberzelige Tier hȁnd müesen ablìfere.
Esoo hȁts mìt de Lȁden ì de Döörfer sìcher ȕberall ì de Schwiiz mee oder weniger ggȁnderet, ùnd sìnd zùm Tȁil nù no en verschwìnded chliine Rȁschte vo de früendere Lȁde, wo hȁnd mögen ȕberlȁbe.