S Fridi Fùchs hȁt mìr verzelt: »Won ich ùs der Schuel choo bìn, hȁni zeerscht zwȁi Joor müesen ìd Chüewȁid go wȁbe. D Noochberi Babette Brȁndli ìscht mini Leermȁischteri gsii, ùnd mer hȁt dȁnn no mȁischtens nùr ȁin bìs zwee Wȁbschtüel bìdient!«
No der Kùmfermazioon seig dȁnn s Fridi fȕr es Joor als Huushalthìlf ùf Öörlike choo. Nach ere Zwȕscheziit ìm Kuurhuus Feusisbërg ìsch si dȁnn zùn ere Famìlie Böhler, Dìrȁkters, ùf Walliselle choo ùnd hȁt deert lengeri Ziit ddienet. Hȁt dȁnn aber schpȍȍter wìder ùf de Chüewȁid ùnd au es Wiili ìm Nöitaal hìne gwoben ùnd uusgnääjet. Wìll de Wȁȁg weniger bìschwëërli gsii ìscht, hȁt si dȁnn aber ì de Füfzger Joor wìder ùf d Chüewȁid zù de Fìrma Elmer gwȁchslet. Doo hebi si de Hȁiri Bȕttler als Wȁbermȁischter ghaa, a vier Schtüele gwoben ùnd dȁnn au no glii emool müese Schìchtaarbet mache.
Ìre drìtt Maa, de Sepp Fùchs, hȁt ì dëre Fìrma e Hȁizerschtell ghaa ùnd ìscht bìs zù siiner Pangsionierig doo go schaffe. Ër ìscht ì de freie Ziit ùnd no em AHV-Alter vìll ì der Pooalp oben am Holz Uufrȕschte gsii. S Fridi hȁt dȁnn aber wìder uusgnääjet ùnd ì der Schtoffkontrole gschaffet ùnd au nȕme müese schìchte.
Ùs eerschter Eeh hȁt s Fridi en Soon ghaa, der Erich Rhiner, wo nach ere lange Ziit ìm Ùssland wìder ìs Hüebli zrùgg choo ìscht. De Grosbueb Heinz hȁt vor e paar Joore s alti Huus vo s Ööler Pfȁnnigers abggrìssen ùnd nöi uufbbout.
Ìre Ruhischtand hȁnd s Fridi ùnd de Sepp Fùchs zeerscht ìm Vorder Erli ùnd dernoo ìm Sackhuus nȁbet em Altershȁim ›Drei Tannen‹ verbroocht, bìs es dȁnn bȁidne nȕme guet ggangen ìscht ùnd’s hȁnd müesen ìd Pflȁȁg ìs Hȁim ȕbere zȕgle.
Solang ich mi mag bsìnen ìsch s Fridi di eltischt Hüebleri woorde, won au no de 99ischt Gìburtstaag hȁt tȍȍrffe fiire.
Si hȁt ìmmer Freud ghaa ame Bsuech ùnd hȁt mìr au ìmmer vìll vo de früenere Ziit verzelt, wo bì ìne no Handschtìck-Maschine ggloffe sìnd, won de Schtìckere fȕr di sȁb Ziit es guets Iikomme ggëë hȁnd. Die Hërrlichkȁit ìscht dȁnn aber nach em Eerschte Wȁltchrieg fascht plötzli z Ȁnd ggange, wìll doo d Schtìckerei-Chlȁider ùnd -Bluuse ganz ùs der Moode choo sìnd. Mȁnge vorhër guet verdiened Schtìcker hebi dȁnn de Gùùrt müesen ȁnger schnalen ùnd ììrged en Aarbet ìn ere Fabrìk aanëë.
S Fridis Vatter ìscht dȁnn ì der Folg bìs no em Zwȁite Wȁltchrieg ìn Pìlgerschtȁȁg bì der ›Hesco‹ Nagelfabrìk go schaffen ùnd hȁt rȁinen Aarbetswȁȁg e paar Mool d Ëërden ùmrùndet! Gliichwoll ìscht ëër em Sùndig nȕd öppen ìm Lëënschtuel gsȁssen ùnd hȁt uusggruebet.
Ich hȁ vordraa scho vermërkt ghaa, das mer dene Pfȁnniger früener gsȁit hȁt ›s Öölers‹. Doo ìscht aaschined ì de früenere Ziit ›Mȁgiööl‹, wo mer zùme Tȁil fȕr d Lampe bbruucht hȁt, vo Rapssoome (Rüebse) prȁsst woorde, ùnd em Name noowe hȁnd s Öölers oben a de Schtȁiwȁid es Schüürli mìt vìlìcht zwoo Jucherte Wìsen ùnd Wȁid bsȁsse.
Ìm Fȁlmis ìscht dë Name bìs hȕt ërhalte bblìbe, ùnd mìr hȁnd amel ìn jùnge Joore mìt de Schii vom Waldrand ùnderhalb em ›Öölerchopf‹ e Schùssfaart ìs Fȁlmis abe gmacht.