Won öiseri Chìnd no ìd Schuel ggange sìnd, hȁmmer en langjȍȍrige Biilihungchùnd ghaa, wo z Wald Fabrìkant gsii ìscht. De Hans-Jakob Honegger ìscht en Schuelkolleeg gsii vo miner Mueter ùnd bìn öis jewiils en gërngseene Gascht wo ìmmer en Huufe gwȕsst hȁt z verzele. Mìr hȁnd em drùm ùnder öis öppen au ›Wanderprediger‹ gsȁit. Jetz ìscht aber dë Honegger won er elter woorden ìscht e paar Mool mìt emen Ùnggle von ìmm mìt em Auto zùn öis ufe z faare choo. De sȁb Honegger ìscht es gschiids Huus gsii ùnd z Zȕri ùnen ETH-Profȁsser. Was aber fȕr öiseri Chìnd vìll ìntressanter gsii ìscht, dë Maa hȁt en Oldtȁimer gfaare. Das ìscht en Mercedes gsii, wien en di tütsch Gȁneralitäät ìm Zwȁite Wȁltchrieg gfaaren ìscht. Do hȁt mer s Tach chöne hìnenabeloo ùnd offen ùmefaare.
Ich bsìnn mi drùm no ase guet draa, wìll jewiilen ȁine von öiserne Bueben ìs Geer hìnderen ìscht go s Mȁchlers Chìnd alarmiere: »De Profȁsser mìt em Mërz ìsch doo!«. Die sìnd amel all mìtenand ìm Laufschrìtt aaztuube choo, au mȁngs Mool schier ùnder das Auto ùndere gschloffen ùnd hȁnd di wȁiche Lȁderpolschter gschtrȁichlet ùnd alles Drùmm ùnd Draa bìwùnderet, hȁnd bìm Abfaaren au de Schofföör mìt em tìcke Halstuech, de Lȁderhȁntschen ùnd pelzgfüeterete Chappen aagschtuunet wien öpper ùs eren andere Wȁlt. Ìscht dȁnn jewiils das Auto ìm Fȁlmis ȁne verschwùnde, ìsches au bìn öis noodisnoo wìder rüebiger woorde.
De Hansjakob Honegger ìscht zȁme mìt siner au ledige Schwöschter Bërta a der Asylschtrooss dihȁime gsii ùnd sìnd Sidefabrìkanten ì de drìtte Gȁnerazioon gsii. Ìre Grosvatter hȁt ìm 1899i ìm Felsechȁller ùssen e Sidefabrìk bbouen ùnd hȁt au z Erlosen ùnen en Bìtrììb ghaa. Derzue aber nȁbet de Vìlla ›Rosenheim‹ d Wìnderei, wo scho fȕr d Handwȁber Sidefaden uusggrȕschtet hȁt. De Fìrmegrȕnder ìscht bìm Iirìchte vom Zwiiggschȁft z Erlose töötli verùnglȕckt ùnd siis Gschȁft dernoo vo drei Sööne wiitersgfüert woorde.
Es ìscht ì früendere Jooren au der Ërnscht Honegger ìm Tobelhoof en Hùngchùnd vo öis gsii. Dem siini Naachkomme sìnd scho drüüviertel Joorhùndert z Kanada dihȁime.
Ì de Sidefabrìk vo s Honeggers hȁnd amel öiseri Müetere Sideschtoffabfȁll gholt zùm Schnìtthüet fȕr d Ùmezȕȕg mache. No früener sìnd die Abschnìtt vo de Handwȁber choo, mer hȁt drùm ìmmer en Schtrȁiffe vom Wupp abgschnìtte, das mer nȕd nöi hȁt müesen iizie. De frìsch Zettel ìscht aber dȁnn hìnder em Gschììr aatrëëjet woorde.
Mììr hȁt vor vìllne Joore de Honegger Arnold Junior d Mùschter vo de Grawatte wo ìm Felsechȁller gwobe woorde sìnd zȁiget, ùnd ich hȁn müese schtuune was fȕr hërrlichi Sache doo gmacht wëërded.
Die Wȁberei ìscht dȁnn vo de Chȁller AG ìm Nöitaal ȕbernoo woorde, dermìt hȁt mer dȁnn au d Sidefabrìkazioon iigschtellt ùnd ùf moderni Kùnschtschtoff, ich glaube hauptsȁchli fȕr Vorhȁng, ùmgschtellt. Sìd zwȁi Jooren ìscht das no di ȁinzig Walder Wȁberei won nȕd de Globalisierig zùm Opfer gfallen ìscht, ùnd au die mues schwëër gȁge d Konkurrȁnz vo de Bìlligloolȁnder kȁmpfe.