No vor 120 Joore hȁt mer z sȁȁgen ekȁi Toonrööre bbruucht zùm e Wìse trochelegge. Früener sìnd ȁifach Grȁȁbe dùrs Land dùre zoge woorde. Wìll ȁinewȁȁg Heu ùnd Ëmd a Bùùrdenen ùf em Rùgge hȁitrȁit woorde sìnd, hȁt das au niemert schtarch gschtöört. Noodisnoo hȁt mer dȁnn aber Mìscht ùnd Gȕle mìt em Wagen oder eme Zwȁirederchaaren ùfs Fȁld gfüert. Esoo sìnd ȁim di tüüffe Grȁȁbe leschtig woorde, ùnd mer hȁt no Mìttle gsuecht zùm’s zuetecke. Das aber s Wasser gliichwoll abgloffen ìscht, hȁt mer aafää Tolen iilegge. De Graben ìscht ùf de fescht Grùnd aben uusggrabe woorde, dȁnn sìnd ùf de Siite rùndi oder no besser länglichi Schtȁi ùs em Bach oder vome Fȁldschtȁihuuffe, wo mer us em Acher uusglȁȁse Schtȁi näumen ame Fȁld oder Waldrand uufbbìge ghaa hȁt, gschtelt woorde, ùnd drȕberȕbere Schìferplatte glȁit. Die hȁt mer a Fìndligen ùs em Glaarnerland abgschpalte. Min Vatter hȁt amigs verzelt: En Maa ùs em Kanton Schwiiz ȁnedùre heig a vìlnen Oorten asigi Tole gmacht. Er hȁt nȕd emool me gwȕsst, hȁt mer em Xafeeri ›Toller‹ gsȁit wȁg siner Aarbet, oder hȁt dë Maa wȕrkli ase ghȁisse. Tole machen ìscht aber nȕd di ȁinzig Dienschtlȁischtig gsii, wo von ìmm bìn Puure gmacht woorden ìscht, au Bäum schniiden ùnd zweje heb er mȁischterhaft chöne. Grosvatter ùnd Vatter, beed hȁnd vom Xafeeri gleert Chriesibäum veredle. Zwoor mȁischt ìm Augschten oder Septȁmber, no em Chriesigȕne. Verschtrìche hȁt mer no mìt waarmflȕssigem Baumwachs, wo mer ìn ere Bȕchs ȕber eme Füürli schtriichbaar gmacht hȁt. Als Aadȁnke an Xafeeri hȁt min Vatter no e Baumschäär ghaa, won em dëë emool ùs em Kanton Schwiiz ȁnedùre bbroocht hȁt, won ëër mìt Lauwerzer- ùnd Chȕsnachter Zwej ìs Oberland ìscht cho zweje!
[ 24 ]