Ìm 1880i gìboore, ìscht de ›Glaaser Hesse Ruedi‹ ìm Büel eso rȁcht als Originaal ì miiner Erìnnerig bblìbe. Ëër ìscht von ere Hessefamìlie, wo scho sìd Aafang 1700 ìm Büel aasässig ìscht. Scho sìd mȁnger Gȁnerazioon sìnds doo als Glaaser, vorhër als Zìmmermane täätig. Mìr hȁnd ìm Ghȁischt en Paneeter (Barometer) ghaa, won en Glaaser Hess ìm Büel gmacht hȁt. No d Mueter vom ›Nȁgeli Ruedi‹ heb sich mìt em Fërtige vo Paneetere bìfasst. Zùr Hauptsach sìnd aber ìm Büel ìmmer Fȁischter gmacht woorde. Esoo ìm letschte Joorhùndert fȕr d Schpìnnereie Flùms ùnd Baar; dȁnn aber au fȕrs Hotel Rìgi Kùlm. Jetz de Glaaser Ruedi! Dë ìsch mìr ȁigetli ìn Erìnnerig bblìbe, scho wȁg siim mȁischt roote Nȁgeli, won ëër Joor ii, Joor uus schtȁndig ìm Muul ghaa hȁt, ùnd wien ëër ìmmer ì allne Tschoopeseck Mȕnz ghaa hȁt.
De Frìtz a de Halde hȁt emool verzelt, wien er de Mȁiacher aab Pöörtli gmääjet heb. Es heig’s au gaar nȕd wele haue; vìll z troche seis gsii, ùnd all paar Meeter hebs es Wȁschpinȁscht ghaa, ùnd die ›Chöge‹ hebed allpott gschtoche. Doo seig de ›Nȁgeli Ruedi‹ s Wȁȁgs choo ùnd heb aafoo proleete. Doo derbii heb ëër ìmmer mìt der ȁinte Hand ìm Tschoopesack mìt siim Mȕnz gchlìmperet. Do heb de Ruedi es Wȁschpi gschtoche! D Hand zùm Sack uus ìscht ȁis – ùnd wie s Biisiwȁtter seig de Glaaser de Mȁiacher aab verschwùnde. Bìm wiiters Määje heb dȁnn öppis gglȁnzt ìm Graas ìne – bìm gnäuer Luege sei dȁnn es ganzes Hȁmpfeli Mȕnz ùs s Ruedis Tschoopesack, am Pöörtli ùnd ìm Siitegrabe fȕrechoo.
Es heb si ùf de Schȁidegg oben e Serwiertochter grüüsli gäägeret, wìll de Glaaser s ganz Zit mìt em Mȕnz ìm Sack gschpìlt hȁt, aber gliichwoll mìt ere Noote heig wele zaale. Do druuf heb de Ruedi guetmüetig gmȁint: «Jȁȁ halt, daas Mȕnz ghöört de Mueter – fȕrs Gwandbùtze!» Fȕr sis Schiibeglaas bìm ›Schërbehans‹ z Rapperschwiil ùne go hole, hȁt de ›Nȁgeli Ruedi‹ amel nȕd es Ross – nȁi ȁini vo siine guete Zùchtchüenen iigschpane. Es hȁt jo dȁnn au no nȕd vìll Vercheer ghaa dùrs Grùndtaal ab. Jedi Chue heb ëër dezue bbroocht am Lȁitsȁil z lauffe, ùnd öppen eso es Hornvee heb rȁcht Freud ghaa, de halb Wȁȁg ùf Rappi z traabe. De Hesse Ruedi ìscht en guete Veezȕchter gsii ùnd hȁt au ìmmer gueti Muni en Schtieremäärt bbroocht. Wo no d Prämierig z Wald ùf em Schlìpfplatz ùnd bìm Gmȁindshuus gsii ìscht, sìnd emool zwee Veezȕchter rȍȍtig woorde, si weled s Ruedis ›Herzögli‹ em Mȁȁlschtaub Bërt ìm Zollhuus go voorfüeren ùnd go luege, was dëë hȕt fȕr en Luun heb. [ 8 ] Wo si die Mane no eme Wiili verabschìdet hȁnd, sei em Halbheer siis Muul scho liecht ùf zwȁnzg ab Achti gschtande! Wo’s dȁnn das Muneli au no hȁnd wele wȁȁge loo, sei ȁndgȕltig Füür ìm Tach gsii. Vee wȁȁgen ìsch nie em Zollhüüsler sis Hobby gsii.
Eso ùm de Zwȁit Wȁltchrieg ùme hȁt sich dȁnn de ›Nȁgeli Ruedi‹ hauptsȁchli no mìt em Holzhandel bìfasst. Rùndùmen ìn Wȁldere hȁt ëër es wachsaams Aug druuf ghaa, wëër öppe gholzet hȁt. I bsìnn mi no guet; cha mer de Ruedi au no fȕfzg lange Joore no lȁbhaft voorschtele. Siis gsùndfarbig Gsìcht hȁt ìmmer eso frȕntli driiglueget mìt em obligaate Nȁgeli ìm Muul. E Westen aa, mìt ere schwëëren Uurechette, ùnd ìmmer en Hooggeschtȁcken ì der Hand, ùf em Chopf en grüene Huet. Esoo ìscht ëër siine Lüüte noowe ggange. Miin Vatter hȁt ìmmer gërn mìt ìmm ghandlet, scho drùmm, wìll de Glaaser Hess nȕd wȁg jedem Eschtli es Büro uuftoo hȁt. Wȁnn er bì öis verbiichoo ìscht, ìsch er mȁischtens au zùme Gschpass uufglȁit gsii. Ase glaubi, wììrt de ›Nȁgeli Ruedi‹ no bì vìle Ziitgnossen ì beschter Erìnnerig sii.
[ 9 ]