Wȁmmer vo de Geeralp gȁgem Maarchschtȁi den alte Schtroossen ìd Schȁidegg ùnd d Pooalp ue noowewanderet – es sìnd schtùckwiis mìndeschtens drei uuszmache, wìll mer ìmmer dȁnn, wȁnn’s z fescht uusgcharet ùnd uusgschwȁmt gsii sìnd, dernȁbet wìder en nöie Wȁȁg aapaanet hȁt – chùnt mer ìn ›Liserank‹ ue, wo de Wȁȁg e schaarffi Wȁndig ùf di hȕtig Schȁideggschtrooss macht. Ùf der andere Siite vom Paarkplatz ìscht de Sanggaller Maarchschtȁi ùf eme Nagelfluefelsen oben ùnd zȁiget en alti, früener lang ùmschtrìttni Maarch zwȕsched de Groofschaften Ùznen ùnd Grüenigen aa. Im Zȁmehang mìt dem Grȁnzschtriit ìsch ìn alten Ȕberlìferigen ìmmer au öppe de grooss Fìndlig gȁge d Wolfsgrueb ufe bìnȁnnt. Dë rìsig Schtȁi ùs de Glaarner Alpen ìsch mìt em Lìndtgletscher ìn öises Gìbiet trȁit woorde. Ìm letschte Joorhùndert hȁt di Schwiizer Natuurforsched Gsellschaft dë Schtȁi gchauft ùnd ùnder ìren Schùtz gschtelt. De Bsìtzer vom Land, wo das Natuurwùnder verchauft hȁt, ìscht aaghaa woorde, es mües ìmmer en Ahore nȁbetzue wachse, ùnd wȁnn die emool setti abgoo, seig ùf Chöschte vo de Gsellschaft wìder e nöiji z setze. Jetz sìnd ȁben Ȁndi letschts Joorhùndert die zȁȁ Franke, won fȕr en Baum zaalt woorde sìnd, ebe no härt ëraarbȁiteti Franke gsii. En Baum won grooss woorden ìscht hȁt au vìll Schatte ggëë. Esoo ìsch es choo, as das Ahorli ali paar Joor gschtoorben ìscht. Böösi Zùnge hȁnd wele haa, mer heb de Natuur zìmli massiiv nooweghùlffen ùnd ìm Wìnter, wȁnn’s härtgfroore gsii ìscht, öppenemool mìt der Achs echli a d Rìnde gchlopfet. S ȕbernäächscht Joor seig dȁnn wìder en nöie Baum felig gsii. Item, es sìnd anderi Ziite choo, ùnd de Noofolger hȁt ìm Sùmmer zùm Znüüniȁsse lieber Schatte ghaa. Esoo schtoot dȁnn sìd de Zwȁnzger Joor ìmmer no di gliich Ahoren ùnd verteckt de Fìndlig, das nȕme vìll Lüüt wȕssed, was do ùne verboorgen ìscht. Au achtet der Autofaarer sowìsoo nù no ùf d Schtrooss ùnd gseet d Wùnder vo de Natuur nȕme. Es wùùrd si zwoor hȕt no loone, öppenemool mìt offnen Auge dùr öiseri schöön Gȁged z goo.
[ 19 ]