Es ìscht im Sȁchsedriissgi gsii, hȁts ì de Hüebli Schuelwacht a de Fasnacht drei Ùmeezȕȕg ggëë. Emool ofiziell ›s Hüebli Ȁis‹ ab zwölf Joore. Dȁnn hȁnd aber d Viert- bis Sȁchstklȁssler no es ›Hüebli Zwȁi‹ uusgrȕschtet. Zùm Drìtte hȁnd dȁnn di no jȕngeren as ›Fȁlmis Ȁis‹ mìtgmacht. Beed groossen Ùmezȕȕg hȁnd d Fasnacht mìt ›Ussewacht-Normaalmannschaft‹, das hȁisst mìt Bielitrȁȁger ùnd ȁifachem Schpììl, ìn Aagrìff gnoo. Eso en Ùmezùùg hȁt ìmmer e tradizionelli Uufschtelig ghaa. Kùmidiert hȁt de Haupme. Aaglȁit mìt eme blaue Wafferock, eme Schnìtthuet mìt Sidebȁndel ùnd Fȁderepusch. Ùf den Achsle goldig Epeletten ùnd en lange Schleppsaabel am Halfter. A de Hosenoot brȁiti goldigi Tresse, ì de lìngge Brùschttȁschen an ere Kordlen e Sìgnaalpfiiffen ùnd wiissi Hȁntschen aa. De Haupmen ìsch ìmmer schtramm lìnggs vo der Ȁinerkolone gloffe. Zwee Seckelmȁischter, ìn ere roote Bluusen ùnd enere roote Chappe mìt em Name vom Ùmezùùg, hȁnd an Hose schmaali, roti Tresse ghaa, ùnd ame Lȁderrieme di viereggig Holz- oder Blȁȁchkassen ȕber d Achsle ghȁnkt trȁit. S Wìchtigscht ìscht aber s Chüehörndli an ere roote tìcke Schnuer, wo’s bbruucht hȁt, zùm em Haupme guuge, wevìll mer iignoo hȁt. Esoo sìnd die zwee dȁnn looszoge, ìmmer em Ùmezùùg voruus, vo Huus zù Huus. De vorderscht Bueb ì der Ȁinerkolonen ìsch dȁnn de Bielitrȁȁger gsii. Ùf em Chopf trȁit er en Tschaggo mìt Pompon drùff. Ùmbbùnden e wiissi Schooss, s Bieli ìm Aarm, ùnd a de lìngge Siiten es Bȁjenett, rooti Bȁndel a de Hose. De Fȁȁnerich, de zwȁit ì de Rȁȁje, trȁit au en Schnìtthuet, hȁt es Faschinemȁsser mìt Messinggrìff am Sänteron ùnd brȁiti Sìlbertressen an Hose. Bìm Uufzùùg schwìngt er de Faanen ùnd trȁit wiissi Hȁntsche dezue. Dȁnn chùnt s Schpììl, en Tambuur ùnd en Pfiiffer mìt grüenem Beret ùnd grüene Bluusen ùnd sìlberi Tressen an Hose. Das Schpììl hȁt di alten Ordenanzmȁrsch ùs em letschte Joorhùndert gschpìlt. Tambuur ùnd Pfiiffer trȁȁged polschtereti Epelette, ùnd sìnd di gsuechteschte Bueben ì de Gmȁind gsii. Dȁnn chömed ì der Kolone drei Schȕtze. Bìm ›Hüebli ȁis‹ uusgrȕscht mìt Tragoonerbìschtole, bìn jȕngere mìt Pùlverbìschtole. Ùf em Chopf en Tschaggo, a de Siite Faschinemȁsser oder Bajenett. Ùf den Achsle Blȁȁchepeletten ùnd rooti Tressen a de Hosenoot. Z hìnderscht chùnt dȁnn de Lüütenand mìt Schnìtthuet ùnd Schleppsaabel, wie de Haupme goldig Epelette, aber gold- ùnd sìlbergschtrȁift brȁite Tressen an Hose, ùnd de Tornischter am Pùggel, mìt em Schüüsspùlver ùnd öppen enere Reservebìschtole drìn. De Lüütenand ìscht fȕr d Schüüsserei verantwortli. [ 32 ] Notüürli trȁit au ëër en blaue Wafferock, won mȁngs Mool au nochli z gross gsii ìscht, ùnd wiissi Hȁntsche derzue. Früener hȁt mer fescht druuf glueget, das die Buebe möglichscht tùnkli Tschööpen ùnd langi tùnkli Hose trȁit hȁnd. Do draa hȁnd dȁnn d Müeteren oder au di elter Schwöschter Tressen ùf di ùsser Hosenoot bbüetzt, wo mer bì de Lydia Glur-Hȕrlimaa ìm Hìnderdorf, ùnen am Schwiizerhoof, poschtet hȁt. S ›Hüebli zwȁi‹ hȁt sȁb Joor Pȁch ghaa ùnd ooni Bìwìlligùng en Tȁil von Iinaamen als Puess müese abgëë. Jetz aber s ›Fȁlmis ȁis‹, das sìnd jo dȁnn Eerscht- bìs Drìttklȁssler gsii. Haupmen ìsch de Hìrschacher Otti, Lüütenand de Buecher Max gsii. Schȕtz de Chuenze Jöggel mìt ere Zapfebìschtole. Mit eme Blȁȁchchȕbeli ùs s Hessels Basaar hȁt de Max Hess ìm Erli gchȕblet, ùnd iich hȁn em Hùldi Peter sin nöie Schwiizerfaane gschwùnge. Au en Seckelmȁischter hȁmmer ghaa, de Schpȍrri Ërnscht, ùnd de jȕngscht, de Chuenzen Ërnscht, ìscht Bielitrȁȁger gsii, mìt eme Schiitbiel, enere wiisse Schooss vo de Schwöschter ùnd eme Tiroolerhüetli ùf em Chopf. Tresse hȁmmer nù schmaali gchauft, sùscht wäär alles z tüür choo. Au sùscht hȁt mer ȁifach ìmprovisiert. De Haupme hȁt zwoor eso öppis Äändlis wie en Schnìtthuet trȁit ùnd au en chliine Saabel noowegschlȁikt. Au em Lüütenand sin Schnìtthuet ìscht nȕd vo Sidebȁndel gmacht gsii, ùnd schtatt eme Tornìschter hȁt en chliine Rùcksack de Dienscht too. Aber d Lüüt ì de Schuelwacht hȁnd Freud ghaa an is, ùnd de Seckelmȁischter hȁt wacker iignoo. Em Max sin Trùmmelchȕbel hȁt zwoor scho bì Halbziit es Bìtzeli aafoo schëërbele, ùnd die choge Zapfebìschtole ìsch ȁ nȕd ìmmer loosggange. Gliichwoll ìsch no lang, bsùnderhȁitli bìn Bìtȁiligte, ›Fȁlmis ȁis‹ ì gueter Erìnnerig bblìbe.
[ 33 ]