Wo d Chüewȁidfabrìk bboue woorden ìscht, hȁt mer fȕr d Trùcklȁitig vom Halpërgweijer obenabe z machen ob em Hoorȁi en brȁite Grabe müesen ìd Nagelflue schprȁnge, demìt hȁts au en Abchȕȕrzig ggëë ìd Fabrìk abe. De Grosvatter hȁt amel verzelt: «Di alt Schtrooss seig vorane zmìtzt de Bëërg uuf choo, wo hȕt d Choschthüüser schtönd, dȁnn dùr de Chüewȁidweijer dùùr ùnd nachane gääch de Hoger uuf. Wiiters obe dȁnn wìder dùr de Weijer dùren ùnd esoo ìd Lueget ue. Mer hebi also wȁg dem Fabrìk- ùnd Schtauweijerbou wiit noowen e nöji Schtross gmacht.»
Die Abchȕȕrzig dùr de Felsen ue ìscht ìm Wìnter ìmmer von ere Hìlfschraft usegschuflet woorde, sìnd doch di sȁb Zit es Gschaar Bëërgler, mȁischt Fraue, ìd Chüewȁid abe go schaffe. Jetz wȁnn’s emool iisig woorden ìscht deruuf, hȁt mer au öpper vo de Wȁberei gschìckt zùm de Sach abhȁlffe. Esoo sei mȁischtens Ruess ùnd Schlaggen ùs em Tampfchessel use gschtreunet woorde. Wìll doodervoo das Schtrȍȍssli cholschwarz woorden ìscht, hȁt sich bìn Lüüte nooznoowe de Name Cholewȁȁg iibbȕȕrgeret.
Dë Cholewȁȁg ìscht vo Aafang aa mìt eme feschte Haag, öppe 4 Schue brȁit, iighaaget gsii. Mer hȁt mìr verzelt, de Gosswiiler, won ùms Driissgi ùmen ì de Pooalp hìne bìm Schaffner Verwalter gsii ìscht, hebi sich en Gschpass druus gmacht, zmìttag wȁnn «d Fabrìkwiiber» ùf em Hȁiwäg gsii sìnd, ùnd gìnau dȁnn dùr de Cholewȁȁg uuf z rite. Wìll vor siim füürige Ross die Frauen ùf bȁid Siiten ùnder em Haag dùre gflöchnet sìnd, heb sich ›dë Sidian‹ iifam gfreut. Ase de Komȁntaar vo de Hesseschaagge Babett ìm Hìndergaden obe.
Dùr de Cholewȁȁg ab hȁts ìm Wìnter au ìmmer en guete Schlìttwȁȁg ghaa. Dë ìscht zwoor no em Verzele vo mire Mueter öppenȁim zùm Verhȁngnis woorde, wìll ùnedùre s Wȁȁgli au gaar gȁgen use ghaldet hȁt. Ase hebi mee as ȁin Halpërgpuur sini Mìlechtause müesen ì de Schtuuden ùne go sueche, wìll’s en ab em Wȁȁg nȁbetabegschletzt hȁt.
[ 43 ]