Wääret de Razionierig hȁnd d Puure, aber auch sùscht Hüenerhalter, wo mee as di zuegloonen Ȁierleggere ghaa hȁnd, e voruus bìschtìmmti Zaal Ȁier müesen ablìfere. D Samelschtell fȕr öis ìscht ìm Konsuum am Doorfplatz gsii (Volksbank). Wëër dìrȁkt verchauft hȁt, hȁt d Määrggli derfȕȕr ìs Chriegswììrtschaftsamt ìm Gmȁindshuus müese brìnge. Deet ìscht au fȕr ali anderen iignoone Lȁbesmìttelmaargge d Samelschtell gsii. Ase hȁt miin Vatter vo der Mìlchgnosseschaft Aa, Fȁlmis, Oberholz müese d Määrggli abrȁchne. De Sepp Schnyder ìm Oberholz hȁt dȁnn no jede Tag zwȁi Mool ì de Chüewȁid ùnd eme Tȁil vom Saagerȁi Mìlch uusgmȁsse. Am Moorgen ìsch ëër mìt em Ross gfaaren ùnd zoobig mìt em Handwage. Vo der Usmȁssmìlch sìnd dȁnn all Monet d Maargge zù öis bbrocht woorde, au vo de ›Taavete Lina‹ won ì der Oo ì de drìtten Iinȁmerei ìri Chùnde bìdient hȁt. Emool wo de Vatter ìm Dienscht gsii ìscht, hȁnd d Mueter ùnd de ›Schaagge Köbi‹ lang z rȁchne ghaa, bìs ales gschtìmmt hȁt. Gliich hȁnd d Määrggli müese fùrt, ùnd trotz em Prȁssiere vo de ›Lise‹ seig sii halt zwoo Minute z schpoot ìs Dorf choo. S Gmȁindshuus seig zwoor no offe gsii, aber das ›Beeri‹ hìnder em Schalter heig schnìppisch gsȁit: «Iich ha jetzt Fiiroobig, Sii müend halt moorn wìder choo!» – Dëre heig si dȁnn d Mȁinig gsȁit! Aber es hebi ales nüüt too! Cha mer voorschtele, wie d Ghȁischtfrau no dùrs Schtȁgehuus ab greseniert hȁt. Dùsse seig ìre doo de Kurt Ehrmann noowegschprùnge, heb gfrȍȍget was loos sei ùnd die Määrggli dȁnn halt ìs Aarbetsamt ine gnoo. Ëër tüegs dȁnn am andere Taag sȁlber ìn obere Schtock ue ùnd e Bìschtäätigùng chöned jo dȁnn di sȁben ufeschìcke. Ase hȁt d Mueter nȕd noomool zwoo Schtùnd müese lauffe zùm de Chriegswììrtschaft ›Gnüegi tue‹.
Apropo Chriegswììrtschaft! Ìm 1942i hȁt mer de Polizìscht Zollìnger gschìckt, bìn Bëërgpuuren ì de Hüebli Wacht go luege, eb ali Mìlch ùnd Ȁier abglìferet wëërded, ùnd eb nȕd mee Tier ùme seiged as aaggëë. Das heb dem guete Maa gaar nȕd passt! Asen ìscht de Walder Oornigshüeter ame nȁblige Taag am Bach noowen ìs Ghȁischt ue choo. Ëër hebi tȁnkt, de Presi vo de Hȕtte chönn ìmm doo scho echli Uuskùmft gëë. Bì jedem Ȁinzelne verbii goo wett ër nöd, schliessli heb au en Polizìscht nȕd gëërn en verschlagne Grìnd! Au heig er nȕd wele, das ìnn ȁine gsäch do obe, es göng jo gaar niemert nüüt aa, was doo z frooge seig! Die choge Schnȕfflerei sei em Zollinger sowìsoo z wìder! No eme Zvȁschper ùnd em Vatter sim Verschprȁche, öppen echli ùmezluege, ìscht de Polizìscht ùnd Oornigshüeter wìder de Bach ab hȁizue ggange. [ 56 ] Es hȁt jo vìlìcht scho öppen e schwarzes Ȁi oder nȕd ganz wiissi Mìlch de Wȁȁg ìs Doorf gfùnde. Schwarzhandel trìbe hȁnd aber ee di groosse Puure, wo mee Schpatzig ghaa hȁnd zwȕschet em Produzierten ùnd em ›Ablìferigssoll‹.
[ 57 ]