Es gìt ìm Lȁbe Fȁll ùnd Zuefȁll won ȁim scho echli nootȁnkli mached. Esoo ìscht doch es Ehepaar ùs Dallas USA z Wald obe gsii, ùnd hetti gëërn de Hëërkùmpftsoort vom Maa uusfìndig gmacht. Siini Grosmueter ìscht e gìbȕȕrtigi Schufelberger vo Wald ìm Kanton Zȕri gsii. D Uurgroseltere sìnd aber scho vor mee als 130 Jooren ùf Amërika uusgwanderet. De Hanshȁiri Schufelberger hȁt mer a sȁbem Moorgen aaglütet: «Hȁscht ȁcht echli Ziit zùm Hìrne, wohëër ȁcht au die Schufelberger chönntid schtame?» Wìll i eso gȁbig de Wiil ghaa hȁn, bìni mìt ùf Schufelberg ufe gfaare. De Hoof Schufelberg do obe hȁt jo den Oberlȁnder Schufelbergere sìcher emool allne de Name ggëë. D Faart ìscht dȁnn ȕber d Egg ùf Wërnetshuuse ùnd ìn Bachtel ue ggange. Lȁider ìsch kȁi uussìchtig Wȁtter gsii, ùnd en Kafi hȁts do obe au nȕd ggëë. D Wììrtschaft ìscht a dem trüebe Vormìttag gschlosse gsii. Ase sìmmer halt ìs Schwert ùf Wald abe gfaare, wo si de Hanshȁiri glii hȁt müese verabschìde wȁgen anderwiitiger Bìaaschprùchig. D Frau Myers ìscht e gìboorni Gȁnferi ùnd cha sich au guet ùf Tüütsch verschtȁndige, wìll ìri Mueter ùs em Bëërnpiet gschtammt hȁt. No eme Kafi sìmmer dȁnn zȁmen ìs Gmȁindshuus ùfs Ziviilschtandsamt ggange. Ich ha’s fascht nȕd chöne glaube; d Frau Albrȁcht hȁt dë Hanshäiri Schufelberger mìt Gìbùùrtsdatum 16.9.1819 ì chùùrzer Ziit gfùnde. Wonhaft sage und schreibe ì Hìnderhessen a de Schȁidegg, wo die drüü etfëërnteschte Hȁimeli vo öisere Gmȁind scho sìd bald 100 Jooren aagsetzt wìder Wald woorde sìnd. I wȁiss nȕd wie lang die drei Hööf bìsidlet gsii sìnd. Aber sìcher, das die Famìlene doo hìne di abglȁgneschte Wìsen ùnd Wȁide vo de Gmȁind bìwììrtschaftet hȁnd. Won i glȁȁse hȁn, das die Regula Schtreuli vo Wȁdeschwiil ȁnedùre dohìndere ghüroote hȁt, ìsch mer klaar woorde, werum die Lüüt ùs der Ȁinöödi fȕren ùf Amërika uusgwanderet sìnd. Es ìscht dȁnn au de Schtammvatter vo de Schufelberger ì Amerika als ȁinzigs Chìnd no z Wald gìbooren ùnd doo iitrȁit. Dë Eduard Schufelberger hȁt ìn Achzgerjooren ì Amërika ghürooten ùnd 16 Chìnde ghaa.
Schufelberger vo Hesse hìnefȕre sìnd bìs ìd Fȕfzger Joor ie Noochbere vom Ghȁischt gsii. Ìm Hìndergaden ȁne, deet wo mer vom Oberholz hëër ùf d Hööchi gȁgem Geer hìndere chùnt, ìscht die Famìlie, wo mer ›s Hessners‹ gnȁnnt hȁt, gwont. Sìd em 1876i, mìt emen Ùnderbrùch vo föif Joore, sìnds doo bì s Schuemacher Peeters ìm Fȁlmis z Miet gsii. Vo dene drei Hȁimen ì Hesse hìnen ìscht nù no de Name bblìbe. Zwoo alti Lìnden ùnd öppen e verchȕmmereti [ 47 ] Gaarteblueme züüged no vo de Vergangehȁit. Gliichwoll schiints mer seiged no nȕd ali Erìnnerigen a di sȁbe Hööf ìm Zȕriuurwald hìne vergȁsse. De Hugo Hess z Gibschwiil, ùnd sìcher anderi, hȁnd no schööni Fotene vo den alte Hüüsere.
Au eso Zuefȁll wie de gschìldereti halted d Erìnnnerig a daas won amig gsii ìscht wach. I freu mi jetz scho, das die Amerikaaner bìm nȍȍchschte Bsuech ì de Schwiiz mìt em Hanshȁiri Schufelberger ùnd mììr dë abglȁȁge Flȁcken Ëërde wȁnd go aaluege.
[ 48 ]