Min Uurgrosvatter, de Jakob Brȁndli-Brȁndli ìm Hüebli, hȁt en Brüeder ùnd zwoo Schwöschtere ghaa, won ìs Land abe zoge sìnd. Di ȁint Schwöschter hȁt en Pfìschter ì der Platte z Esslige ghüroote, di zwȁit en Zollinger ìm Bërgli z Buebike, ùnd der Albërt ìscht ìd Schüürwììs ùf Buebiken abe choo. Doo wȁiss ich aber nȕd gìnau, seb er sich deert iigwiibet hȁt oder nööd.
Vom Albërt hȁnd mini zwoo Grostantene Babette ùnd Ida Brȁndli verzelt, dë seig ì jùnge Jooren en rȁchte Schtùrm gsii, ùnd en Tanzsaal uusruume hebi ìmm dȁnn gar kȁi Müe gmacht. Als Musikant seig er ìm Doorfverȁin gsii ùnd hebi deert intȁnsiv mìtgmacht.
Sini Schwöschter ìm Bërgli ìscht chìnderloos bblìbe, die zwȁi hȁnd dȁnn aber zwȁi Chìnden aagnoo. De Hërmann ùnd d Anna Kröni, won ùs em Aargau gschtamet hȁnd, sìnd dȁnn wie zwȁi ȁigni uufgwachse, ùnd d Anna hȁt Ȁndi Wȁltchrieg en Nȁffe vo der Adoptiivmueter, en Albërt Brȁndli ì der Schüürwììs, ghüroote. Sie ìscht lȁider a der eerschte Gìbuurt gschtoorbe, ùnd der Albërt ìscht no ìm gliiche Joor der eerscht Buebiker gsii, won a de doozmool gfȍȍrliche schpanische Grìpp ùms Lȁbe choo ìscht.
Bìn öis ìscht aber bsùnderbaar mìt de Nookomme vos Pfìschters ì de Platte z Esslige no lang Verbìndig gsii, ùnd de ›Platte Fredy‹ ìscht glaub ich no vìllne bìn öis z Wald oben en Bìgrìff gsii. Bsùnderbaar musikalisch, hȁt ër als Puur verschìdni Chöör gglȁitet ùnd ìscht au en bìliebte, gselige Bȕrger gsii. Hauptsȁchli di zwee jȕngschte Brüedere vo miner Mueter sìnd vìll au mìt ìmm ìd Fërie ùnd hȁnd sich au sùscht ìmmer wìder mìt ìmm zȁmegfùnde.
Mìt de Buebiker hȁnd aber mini bȁide Grostantene ìm Wùlelȁdeli ìm Hüebli no vìll vercheert, ùnd ase hȁn ich de Schüürwììs Otti ìn Ërìnnerig als Fëriebueb, öppe gȁgen Ȁndi 30er Joor. Ich hȁ dȁnn ìm 1948i bì der Tante Babette ggleert Gitare schpìlen ùnd vo ìren ùnd der Ida vìll Sache ghöört ȕber d Brȁndli ìm Hüebli ùnd ȁben au vo dene won vo doo fùrtggange sìnd. Ìri Mueter ìscht ȁigetli e Hüebleri gsii, de Marti Schaagg ìscht ìm Erli uufgwachse, ùf dem Hȁime, wo mini Groseltere hëreghüroote hȁnd, deert wo dȁnn de jȕnger Brüeder Albërt Puur woorden ìscht, wo die bȁiden ìm Halperg ùne vome Chìndlimaa hȁnd chöne s Hȁime chauffe.
Ì de Zwȕscheziit ìscht niemert me ùme vo der alte Gȁnerazioon, ùnd ich hȁn als eltschten Uurgrosbueb vom Marti Schaagg gfùnde, mer setti alts Wȕssen ȕber d Vergangehȁit nȕd ȁifach lo vergȁsse goo. Drùm bìn ich dȁnn au ìm vergangene schööne Hërbscht ùf Buebiken ùnd au zwee Taag schpȍȍter no ùf Essligen abegfaare zùm Luege wie mer deete hȕt lȁbt, ùnd wìvìll no vo der alte Hëërkumft ìm Wȕsse vo de hȕttige Gȁnerazioon verblìben ìscht.
Der Otti senior ì de Schüürwììs ërìnneret sich no guet a siini zwoo Grostante, won ìnn als Fëriebueb nȕd hȁnd wele mìt den andere Goofen ùf em nääche Tùrnplatz vo de Hüebli Schuel lo schpìle.
Ì nöierer Ziit hȁn ich die Brȁndli wìder kȁneggleert ìm Zȁmehang mìt de Landfrauemäärt, ali drüü Joor bìm Rìtterhuus Buebike, wo d Elsbeth ìmmer e fliissigi Hȁlfferi gsii ìscht. Ase hȁt mer deet dȁnn ìmmer au ìre Maa chöne trȁffe.
Ich sȁlber bìn aber emool vor vìllne Jooren oogsìnnet ì die Schüürwììs choo, wo ìm 56i ali Baumwärter uufbbotte woorde sìnd zùm d Obschtbäum go pflȁge, wo bìme bööse Hagelwȁtter z Schade choo sìnd. Dihȁimen ìscht aber doo nùr d Mueter gsii, di Jùnge seiged de sȁb Taag an See abe go Chriesi gȕne. Es Moscht ùnd Zvieri hȁts aber doo gliichwoll ggëë, ùnd asen ìscht mìr dë Brȁndlihoof bìs hȕt ì der Ërìnnerig bblìbe.